«Երևանի քաղաքապետարանն անուղղակի խոստովանում է՝ ՀՀ-ում ծայրահեղ աղքատության մակարդակը բարձրացել է»․ Դերենիկ Մալխասյան

Քաղաքական մեկնաբան Դերենիկ Մալխասյանը ֆեյսբուքյան իր էջում լուսանկար է հրապարակել՝ կից գրելով. «Երևանում օդի աղտոտվածության մասին երեկ գրել էի, այսօր կարդում եմ Երևանի քաղաքապետարանի բացատրությունը։ Ասում են՝ ձմռանը մայրաքաղաքում օդը աղտոտվում է նաև այն պատճառով, որ սեփական տներում մարդիկ տաքանալու համար վառարան են դնում։ Այսինքն՝ Երևանի քաղաքապետարանը անուղղակի խոստովանում է, որ Հայաստանում ծայրահեղ աղքատության մակարդակը էն տիպի է բարձրացել, որ փայտով ու տարատեսակ իրերով տաքացողների տոկոսը աննախադեպ աճել է ու ազդում է Երևանի օդի որակի վրա։
Բնականաբար քաղաքապետարանը էլ չի խորանում, որ Երևանի օդային ավազանը ամառ-ձմեռ նույն աղտոտված վիճակում է։ Չի խոսում ծառերի մասսայական սպանդի, Սովետաշանի աղբավայրի, վայրի շինարարության ու նմանատիպ՝ իրենց ձեռ չտվող այլ երևույթների մասին։
Բայց այս ամենի մեջ ուշագրավ է, որ շարունակում են լռել հայաստանյան բնապահպան ակտիվիստներն ու կազմակերպությունները։ Նրանք շատ հաշտ են այս իրավիճակի հետ։ Մաքուր ու առողջարար օդ ունենալու՝ երևանցիների իրավունքի համար պայքարի նպատակով փող տվող չկա։ Այ ուրիշ բան հանքերի դեմ պայքարը․ անհայտ ծագման գումարներով միջազգային լիքը կազմակերպություններ կան, որոնք լավ էլ փող են տալիս Հայաստանում հանքարդյունաբերության դեմ պայքարելու համար»։