«Փոքրիկ սուլթանի լկտի հայտարարություններն ունեն վտանգավոր նշանակություն»․ Դավիթ Մանուկյան

«Ապրելու երկիր» կուսակցության քաղաքական խորհրդի անդամ Դավիթ Մանուկյանի ֆեյսբուքյան գրառումը. «Ադրբեջանի նախագահն ուղիղ սպառնալիքներ է հնչեցնում Հայաստանի Հանրապետության հասցեին, այն անվանելով ֆաշիստական պետություն և սպառնլով ոչնչացնել։ Պահանջում է կատարել իր բոլոր պայմանները, հակառակ դեպքում, սպառնում է դրանք իրագործել զենքի ուժով։ Արտաքինից այս լկտի հայտարարությունները, իրականում ունեն խորքային և վտանգավոր նշանակություն։
Ինչի՞ վրա հենվելով է փոքրիկ սուլթանը իրեն թույլ տալիս նման հայտարարություններ անել, հարևան ինքնիշխան պետության հասցեին։ Կա երկու հիմնական գործոն, որոնք կարող են ունենալ, ինչպես զսպող նշանակություն, այնպես էլ կանաչ լույս վառել։
Մեկը, որպես պետություն, քո դիմադրողականությունն է՝ արտաքին սպառնալիքների նկատմամբ։ Այսինքն՝ սպառնում կամ հարձակվում են այն պետության վրա, որը իրենցից ավելի թույլ է. Թույլը չի հարձակվում իրենից ավելի ուժեղի վրա։ Ստացվում է, որ մեր և Ադրբեջանի միջև ռազմական բալանսը շարունակում է մնալ խախտված և Ադրբեջանը վստահ է իր ուժերի վրա, դրանից ելնելով՝ ցուցաբերում է նման անբարտավան և լկտի վարքագիծ։
Հաջորդ գործոնը, միջազգային հանրության վերաբերմունքն է՝ մեզ ու մեր տարածաշրջանին։ Գերտերությունների շահերն ու վարած քաղաքականությունն է, որը Հայաստանի և Ադրբեջանի նման փոքր պետությունների համար կարող է լինել անխախտելի պատնեշ, կամ հակառակը՝ դիմացինի վրա հարձակվելու հրահրող հանգամանք։
Այսօր մենք խնդիրներ ունենք այս երկու ուղղություններում էլ և քանի դեռ այդ խնդիրները չեն լուծվել, Ադրբեջանը հա էլ հոխորտալու է, անգամ կարող է դիմել ռազմական ուժի կիրառման, իր այս կամ այն նպատակին հասնելու համար։
Հայաստանի կառավարությունը, ոչ միայն չի կարողանում լուծել այս խնդիրներն, այլև ավելի է խորացնում դրանք։
Խոսքերիս վկայությունն են, վերջին հինգ տարիներին, մեր չընդհատվող կորուստները և ադրբեջանական աճող ագրեսիվ ու ռազմատենչ հռետորաբանությունը»։