«Գերիների հարցը մենք բարձրացնելու ենք նաև Բաքվում»․ Նիդերլանդների ԱԳ նախարար

Այսօր Հայաստանը և Նիդերլանդների Թագավորությունը
ռազմավարական գործընկերության մասին հռչակագիր են ստորագրել։ Այս մասին հայտնեց ԱԳ նախարար Արարատ Միրզոյանը՝ Նիդերլանդների ԱԳ նախարար Կասպար Վելդկամպի հետ համատեղ ասուլիսի ժամանակ։ Հռչակագիրը ռազմական համագործակցություն չի ենթադրում, ոչ էլ սպառազինության հետ որևէ կապ, հայտնեց Նիդերլանդների ԱԳ նախարարը։
Անդրադառնալով հայ-ադրբեջանական հարաբերություններին՝ Արարատ Միրզոյանը նշեց, որ Ադրբեջանի կառուցողական վերաբերմունքի դեպքում խաղաղության հարցում հնարավոր է շոշափելի արդյունք լինի։
Լրագրողների հարցերից մեկն ուղղված Նիդերլանդների ԱԳ նախարարին վերաբերում էր հայ ռազմագերիներին, նրանց նկատմամբ խոշտանգումներին։ Հարցին՝ ո՞րն է ԵՄ-ի և հատկապես Նիդերլանդների դիրքորոշումը, ի՞նչ քայլեր կարելի է ձեռնարկել նրանց ազատ արձակման ուղղությամբ, Կասպար Վելդկամպը պատասխանեց․ «Գերիները պետք
է պաշտպանված լինեն միջազգային չափանիշների համաձայն։ Արդար դատավարության նրանց իրավունքները պետք է պահպանվեն։ Նիդերլանդները և ԵՄ-ն կշարունակեն առաջ մղել այս հարցը, մեր ուշադրությունը սևեռված է խնդրի վրա»,- ասաց նա՝ հավելելով․ «Գերիների հարցը մենք բարձրացնելու ենք նաև Բաքվում, այս պահին շատ բան ասել չեմ ուզում»։