«Իշխանության վախը պետք է բռնենք»․ Մանե Թանդիլյան

«Իշխանության վախը պետք է բռնենք։ Եթե մենք գերիների վերադարձի հարցը պահենք օրակարգում, իշխանությունները ստիպված են լինելու գործընկեր Ալիևին ասել՝ այս օրակարգի հետևաքով իշխանություն ենք կորցնում, հետևաբար մի բան պետք է անել»,- Ազատության հրապարակում հրավիրված ասուլիսի ժամանակ այս մասին ասաց «Ապրելու երկիր» կուսակցության համահիմնադիր Մանե Թանդիլյանը՝ հավելելով, որ կասկած չունի՝ այս իշխանությունների օրակարգում գերիների վերադարձի հարց չկա։

«Գաղտնիության շղարշի տակ ինչ ասես, կարող են ասել, ստախոսների հավաքածու է։ Թող հրավիրեն 23 գերիների ընտանիքներին ու պատմեն՝ ինչ են արել։ Այս գործով պետք է զբաղվել ամեն օր։ Կարող էին հայցերը հետ վերցնելու դիմաց գերիների վերադարձի պայման դնել, կարող էր ԵԱՀԿ Մինսկի խմբի լուծարման դիմաց գերիների վերադարձի պահանջ լինել, այսինքն՝ ինչ-որ բան տալու դիմաց պահանջել հայ գերիների վերադարձ․ սա մարդասիրական է, որևէ ազգություն չի ճանաչում այդ քայլը։ Կարող էին, չեն անում»,- հավելեց Թանդիլյանը՝ կոչ անելով գերիների վերադարձի հարցն օրակարգ բերելու համար անցնել ակտիվ գործողությունների։