«Շատ շուտով Ադրբեջանը գալու է անկլավների ետևից»․ Նորիկ Նորիկյան

«Արդար Հայաստան» կուսակցության նախագահ Նորիկ Նորիկյանի ֆեյսբուքյան գրառումը. «Այնուամենայնիվ, հարգե՛լի հայ ժողովուրդ, անկախ նրանից, թե ձեզանից ոմանք կաստվածացնեն ու ամեն գնով կարդարացնեն Նիկոլ Փաշինյանին, ոմա՛նք՝ Ռոբերտ Քոչարյանին, իսկ ոմա՛նք էլ Սերժ Սարգսյանին, ակնհայտ է, որ Ադրբեջանի հետ պայքարում մենք նվաստացուցիչ ու ամոթալի պարտություն ենք կրել։
Այս գործընթացից Ադրբեջանը դուրս եկավ աննախադեպ հաղթանակով, ինչը նրան թույլ է տալու առաջիկա տարիներին տարածաշրջանում հանդես գալ օրակարգ թելադրողի դիրքերից։
Հայաստան-Ադրբեջան հակամարտության այս փուլն ավարտվեց «Ամեն ինչ Ադրբեջանին, Հայաստանին՝ ոչնինչ» բանաձևով։
Իսկ շատ շուտով Ադրբեջանը գալու է այսպես կոչված, անկլավների ետևից, և ոչ միայն, որովհետև թքած ունի Ձեր պատկերացրած «Խաղաղության օրակարգի վրա», որովհետև, շատ լավ հասկացավ, որ «Ինչքան ուզի, այդքան կտանք» կարգախոսը շատ լավ աշխատում է, իսկ նրան պետք է, որ տարածաշրջանում մենք ոչ մի արժեք չունենանք որևէ մեկի համար։
Աշխարհի տարբեր պետությունների համար մեզ կարեկցելն ու խղճալն էլ բավարար է, որ մեզանից ոմանք իրենց բավարարված զգան․․․
Թող այս ուժերը շարունակեն զավթած պահել քաղաքական դաշտը, թույլ չտալ, որ նոր մարդիկ գան քաղաքական դաշտ, զբաղեցնեն իրենց տեղը, գուցե իրենց սխալներից դասեր քաղած կլինեն, թող շարունակեն իրար հոշոտելն ու ոչնչացնելը՝ իրենց իշխանությունը պահելու, մյուս մասն էլ իշխանության հետ գալու մոլուցքով։
Որ այս աստիճան հաջողել են նվաստացնել ու ողնաշարից ջարդել Հայաստանը, որևէ կասկած չկա, որ կահջողեն նաև ամբողջովին կործանել այն, միայն թե յուրաքանչյուրն իր հերթին ապացուցի, որ անմեղ է, իսկ մրցակիցը՝ դավաճան ու կոռուպցիոներ»։