«Չեմ հայհոյել․ պապիկիս թաղմանն էի շտապում»․ պարեկների կողմից բռնության ենթարկված վարորդ

Պարեկների կողմից ուժի կիրառմամբ մեքենայից իջեցված և բերման ենթարկված վարորդը «ABC media»-ի հետ զրույցում մանրամասներ է ներկայացրել դեպքի մասին: Տեսանյութը համացանցում տարածվել է երեկ, բայց միջադեպը տեղի է ունեցել օրեր առաջ՝ մարտի 31-ին:

«Պապիկս է մահացել, թաղման էի շտապում՝ առավոտյան 10։00-ի մոտակայքում։ Մոտ 25 րոպե ճանապարհը փակ էր, չգիտեինք՝ երբ է բացվելու։ Բոլոր վարորդների հետ ես էլ ազդանշան տվեցի, բայց չհայհոյեցի։ Եկան, ինձ տարան։ Հետո իմացա, որ ինչ–որ հյուրերի են ընդունում։ Մի քանի օր է անցել, բայց ավտոմեքենաս ինձ չեն վերադարձնում․ տուգանային հրապարակում է։ Գնում եմ, որ վերցնեմ, չեն տալիս, այստեղից այնտեղ են ուղարկում»,- ABC media-ի հետ զրույցում ասաց օրերս բերման ենթարկված վարորդը։

Հիշեցնենք, որ երեկ միջադեպի մասին պարզաբանում էր տարածել նաև Ներքին գործերի նախարարությունը:

«Պետական արարողակարգային միջոցառումների շրջանակում, երբ ոստիկանության ծառայողները ապահովել են մեքենաների շարասյան անցումը, վարորդներից մեկը հայհոյանք է հնչեցրել: Նա բերման է ենթարկվել Համայնքային ոստիկանության Կենտրոնական բաժին: Պարզաբանումներից հետո ազատ է արձակվել» , – ասված է հաղորդագրության մեջ։