«ՔՊ-ն տեղեկատվական օպերացիա է իրականացնում 2026-ի ընտրություններին ընդառաջ»․ Վարդան Բալյան

Քաղաքական վերլուծաբան Վարդան Բալյանի ֆեյսբուքյան գրառումը․ «Կառավարող Քաղաքացիական պայմանգիր կուսակցության տարատեսակ ներկայացուցիչների արձագանքը Գյումրիում ընդիմադիր քաղաքապետի հնարավոր ընտրության շուրջ քաղաքական համաձայնությանը առաջին հայացքից կարող է տարօրինակ թվալ: Իրականում իշխանական կուսակցությունը հստակ մշակված տեղեկատվական օպերացիա է իրականացնում 2026 թվականին նախանշված Ազգային Ժողովի ընտրություններին ընդառաջ:
Քաղաքագիտության մեջ կա էլեկտրոբիլիթի հասկացություն, որ քանակական առումով արտացոլումն է ընտրողների վստահության այս կամ այն թեկնածուի ընտրվելու հարցում: Էլեկտրոբիլիթին պատասխանն է հարցին "ի՞նչ եք կարծում, ո՞վ կհաղթի ընտրություններում": Որոշակի պայմաններում էլեկտրոբիլիթին կարող է վճռորոշ լինել քվեարկության մոտիվացիայի տեսանկյունից: Ընտրողները, որպես կանոն, չեն քվեարկում թեկնածուի օգտին, եթե չեն հավատում նրա հաղթանակին, եթե ունեն որոշակի համոզվածություն, որ անկախ իրենց քվեարկության արդյունքներից, հաղթողն արդեն կանխորոշված է: Քաղաքացիական պայմանագիրն, ի դեպ, խորհրդարանական ընդդիմության հետ միասին նախկին-ներկա հակադրության համատեքստում հանդիսանում են էլեկտրոբիլիթիի հիմնական շահառուն մեր երկրում: Ընդդիմադիր ուժերի համաձայնությունը հակաիշխանական թեկնածուի շուրջ քննադատելով, հատկապես, երբ խոսքը տեղական ընտրությունների մասին է, իշխանականները ծառայեցնում են մեկ նպատակի՝ ցույց տալ, որ նախկինների վերադարձի սպառնալիքը միանգամայն իրական է: Պարզ ասած նախկինների էլեկտրոբիլիթիի աճին նպաստելով Քաղաքացիական պայմանգիրը ձևավորում է ապագա համապետական ընտրության քարոզչական դաշտը՝ ընտրողին ուղղորդելով իր համար առավելագույն չափով ձեռնտու բողոքական քվեարկության վարքագծի: Ինչո՞ւ է ՔՊ-ն այդպես վարվում, որովհետև միանգամայն ճիշտ հաշվարկել է՝ միայն այդպես կարող է հաղթել: Պետք է արձանագրել, որ Քաղաքացիական պայամանգրից բացի նաև ընդդիմադիր ուժեր կան, որոնք շահագրգիռ են իրավիճակի նման զարգացումով: Նախկին-ներկա կեղծ հակադրությունից դուրս քաղաքական ուժերը և գործիչները, եթե իրապես ցանկանում են առաջիկա համապետական ընտրություններում հաջողել, ի վերջո պետք է հասկանան, որ քաղաքական, նաև ընտրական ծրագրավորումը գիտություն է: Արդեն այսօրվանից լուրջ քաղաքական-ընտրական նպատակներ հետապնդող ուժերը կարիք ունեն արդյունավետ ընտրական ռազմավարություններ մշակելու և իրականացնելու ունակ թիմեր ձևավորել»: