«Մաքսատուրքերի պատերազմով Թրամփը քանդում է միջազգային առևտրային համակարգը»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Մաքսատուրքերի պատերազմով Թրամփը քանդում է միջազգային առևտրային համակարգը, քանդում է Առևտրի համաշխարհային կազմակերպությունը:

Ընդ որում, այստեղ հարկ է նկատել, որ, երբ խոսվում է այս կամ այն միջազգային կառույցը քանդելու մասին, շատերը անմիջապես դիտարկում են պատկերը այսպես՝ որ այդ կազմակերպությունն այլևս դադարում է գոյություն ունենալ:

Բայց, «քանդելը» պետք է չէ դիտարկել այսպես ասած իրավաբանական կամ ֆիզիկակա գոյության իմաստով միայն: Եթե կառույցը օրինակ կա, բայց դրա սկզբունքները, դրա կանոնները, դրա ուղենիշները չեն գործում, դա արդեն իսկ նշանակում է, որ կառույցը որպես այդպիսին՝ դե ֆակտո քանդված է:

Միևնույն ժամանակ, օրեր առաջ Ռոյթերզը տեղեկություն էր հայտնել, որ ԱՄՆ դադարեցրել է ԱՀԿ-ին անդամավճարի հատկացումը:

Առևտրային պատերազմը Թրամփի ռազմավարական առաքելության կարևոր մասն է, որովհետև առևտրային հարաբերությունները գլոբալիստական բեվեռի անկյունաքարերից են: Հնարավոր չէ լուրջ դիմակայել այդ բեվեռին, գտնվելով ըստ էության նրա վերահսկողության եւ տրամաբանության ներքո ձևավորված ու գոյություն ունեցող առեւտրա-տնտեսական հարաբերությունների համակարգում:

Իսկ Թրամփի կռիվը արեւմտյան գլոբալիզմի դեմ է: Ես հիմա բոլորովին չեմ ասում, թե այդ կռվում ով է իրավացի կամ ում հաղթանակն է նախընտրելի: Այդ կռվում չկան հրեշներ ու հրեշտակներ, երկու պարագայում էլ կռիվը փողի եւ իշխանության համար է: Իհարկե յուրաքանչյուրս արդեն կարող ենք գնահատական ձևավորել ըստ արժեհամակարգի, թե որ կողմում ենք մենք ավելի շատ տեսնում մեզ համար նախընտրելի արժեքային ուղեցույցեր: Բայց, պատկերն ըսստ իս դա է՝ Թրամփը քանդում է իր մրցակիցների համակարգը:

Ընդ որում հարց է, կհաջողվի՞ անել դա, թե՞ ոչ: Բայց նա անում է դա: Ընդ որում, նույնն է թերևս նաև համաշխարհային ֆինանսական համակարգի մասով: Բոլլորովին պատահական կամ կամայական չէ, որ Թրամփը պաշտոնամուտից հետո առաջին քայլերի շարքում դիտարկեց անդրադարձը կրիպտոարժույթներին և ըստ էության տվեց ԱՄՆ ֆինանսական համակարգում դրանք «տեղավորելու» մեկնարկ:

Գլոբալիստական բեվեռի դեմ պայքարը նրանից պահանջելու է նաև ապամոնտաժել այն ֆինանսական համակարգը, որը ևս՝ առեւտրաինին զուգահեռ, տվյալ բեվեռիհամաշխարհային դիրքավորման անկյունաքարն է:

Մենք համաշխարհային փոփոխություններն ավելի շատ տեսնում ենք այսպես ասծա բաց կոնֆլիկտների առումով, այսինքն դրանք են ավելի շատ գրավում ուշադրություն, բայց ֆունդամենտալ հարցերը լուծվելու են ֆինանսատնտեսական հարաբերությունների դաշտում:

Նաև սա է պատճառը, որ հենց այդ թեման է ռուս-ամերիկյան բանակցության առանցքում»։