«Պահանջում ենք՝ Դավիթ Խուդաթյանը չեղարկի իր որոշումը»․ Պռոշյան և Քասախ համայնքների բնակիչներ

Պռոշյան և Քասախ համայնքների բնակիչներ շարունակում են փակ պահել Երևան-Աշտարակ ավտոճանապարհը։ Ոստիկանությունը չի կարողանում բացել ճանապարհը։ Բնակիչները պահանջում են, որպեսզի կառավարությունից մարդ գա իրենց հետ հանդիպման։ Նրանք պահանջում են, որպեսզի Տարածքային կառավարման և ենթակառուցվածքների նախարար Դավիթ Խուդաթյանը գա իրենց մոտ և չեղյալ հայտարարի իր որոշումը, «Նրա կայացրած որոշումը արդար չէ: Մեզ հասած տեղեկություններով՝ Խուդաթյանը որոշում է ստորագրել՝ Կոտայքի մարզի միջմարզային և ներմարզային կանոնավոր փոխադրումների չվացուցակները և երթուղիների սխեմաները հաստատելու մասին, համաձայն որի Պռոշյան-Երևան ուղևորափոխադրումը պետք է իրականցնի «ՄուլտիՏրանսպորտ» ՍՊԸ-ին պատկանող թիվ 277 միկրոավտոբուսով: Երթուղու սկզբնակետը գյուղ Պռոշյանն է, վեջնակետը՝ Երևանի ֆիզիկայի ինստիտուտը»,- ֆոտոլրագրող Գագիկ Շամշյանի հետ զրույցում ասել են բնակիչները։ Ըստ իրենց ներկայացրած տվյալների՝ երթուղու երկարությունը 15 կմ է, տևողությունը 20 րոպե, ուղեվարձը՝ 250 դրամ, տրանսպորտային միջոցների քանակը՝ 6, աշխատանքային ժամերը՝ առավոտյան ժամը 07:00-ից մինչև 19:00-ն: «Այժմ Երևանի հետ կապը ապահովում է «Երևան Տրանսպորտ» ՓԲԸ-ին պատկանող թիվ 25 երթուղիով, ուղեգիծը՝ Պռոշյան-Ավան-Զեյթուն, շաբաթ օրը այս երթուղին դադարելու է գործել, երթուղին էլ աշխատում է գերծանրաբեռնված»,- ասում են բնակիչները: