«Կարևոր է, որ այս շարժումը չունենա պարտվողական «կկվի հոգեբանությունը»»․ Գարեգին Չուգասզյան

Ազատության հրապարակում տեղադրված վրանում տեղի ունեցավ Ազգային-ժողովրդավարական Բևեռի և արցախցիների իրավունքների պաշտպանության խորհրդի անդամների հանդիպումը:

«Փորձում էինք հասկանալ՝ ինչ ճանապարհային քարտեզ ունեն, ինչպիսի լուծումներ են պատկերացնում։ Մենք էլ մեր մտքերը նրանց փոխանցեցինք։ Ամենակարևորը, որ ուզում էինք նրանց փոխանցել, այն էր, որ ժողովրդի տարանջատումը, իրար դեմ լարելու խոսույթը, որ առկա է, անթույլատրելի է և աններելի։ Մենք ամեն օր առնչվում ենք համահայկական գլոբալ հարցի հետ, դա հայության անվտանգության և ապագայի հարցն է։ Ցանկացած հարց պետք է այդ պրիզմայով դիտվի»,- այս մասին հանդիպումից հետո նշեց ԱԺԲ անդամ Եղիշե Պետրոսյանը։

ԱԺԲ անդամ Գարո Եղնուկյանը նշեց, որ արցախցիների պահանջներն այնքան էլ սոցիալական չեն, դրանցում կան սոցիալական բաղադրիչներ, բայց այն փաստը, որ կետերից մեկն Արցախ վերադառնալու հարցն է, դա արդեն քաղաքական պահանջ է։
ԱԺԲ անդամ Գարեգին Չուգասզյանն էլ ընդգծեց, որ եթե կառավարությունն արցախցիների արժանապատիվ կյանքի իրավունքը չհարգի ու սոցիալական խնդիրները չլուծի, այդ մարդիկ թողնելու են, գնան Հայաստանից։ «Ո՞վ է շահելու դրանից, հայ ժողովուրդը չի շահելու դրանից։ Շահում են այն մարդիկ, ովքեր այսօր իշխանության են և պարտվողական «կկուի քաղաքականությունը» տարածում են ամբողջ ժողովրդի վրա։ Եվ այդ առումով շատ կարևոր է, որ այս շարժումը չունենա այդ «կկվի հոգեբանությունը»։ Այսինքն՝ եթե փոքր պահանջների շարժում դառնա սա, հենց «կկվի հոգեբանությունն է»,- նշեց Չուգազսյանը։