«Բաց նամակ՝ տգետ ՔՊ-ականներին ու կառավարության անդամներին»․ Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը․

«ԲԱՑ ՆԱՄԱԿ Կառավարության տգետ անդամներին, քաղաքացիական պայմանագիր կուսակցության վարչության տգետ ներկայացուցիչներին և ՔՊ -ի պատգամավորներին:
Հարգելի տգետ տիկնայք և պարոնայք,
Վարչապետ Նիկոլ Փաշինյանը հայտարարել է, որ ինքն արդեն յոթ տարի է՝ մնում է նույն դասարանում։ Ըստ նրա՝ մեր հասարակությունը գիտելիքի պակաս ունի, քանի որ ինքը ևս այդ պակասի կրողն է։ Նա խոստովանում է, որ առաջնորդում է մարդկանց՝ չունենալով անհրաժեշտ գիտելիք և այդպես նրանց տանում է դեպի աղքատություն ու տգիտություն։ Եվ այս խոսքերը վերաբերում են ոչ միայն իրեն, այլև՝ կառավարության բոլոր անդամներին։
Ուշագրավ է, որ նման աղմկահարույց, եթե կուզեք, ճշմարիտ, եթե կուզեք լկտի սուտ հայտարարությունից անցել է տևական ժամանակ, սակայն կառավարության ոչ մի անդամ, ՔՊ որևէ ներկայացուցիչ չի համարձակվել տարածել այս խոսքերի տեսաձայնագրությունը կամ տեքստային տարբերակը։
Հարց է առաջանում՝ դուք կարծում եք, թե ձեր ղեկավարը սխալվում է, ստում է, թե գուցե կարծում եք, որ նա հոգեկան խանգարում ունի։ Եթե ոչ, ապա ինչո՞ւ չեք արձագանքում։ Եթե համաձայն եք նրա ասածի հետ, ուրեմն ի՞նչ եք անում իշխանության ղեկին՝ ունենալով գիտելիքի այն պակասը, որի մասին խոստովանեց ձեր առաջնորդը։
Հասարակությունը պարտավոր չէ իր ապագան վստահել մարդկանց, ովքեր չեն տիրապետում ռազմավարական մտածողության և մասնագիտական ունակությունների նվազագույն մակարդակին։
Խնդրում ենք՝ անկեղծ եղեք ձեր հանդեպ և ազնիվ՝ մեր ժողովրդի նկատմամբ։ Այսօր մեր պետությունը չի կարող նման ճոխություն թույլ տալ և կառավարվել տգիտության հենքով։
Հույս ունեմ, որ գոնե այս գրառման պարագայում կհաջողեք հաղթահարել Ձեր տգիտությունը և կհասկանաք՝ ինչ եմ ուզում ասել։ Իսկ եթե, այնուամենայնիվ, դժվարանաք ու չկարողանաք ընկալել թեմայի կարևորությունն ու լրջությունը, հոգ չէ, կփորձեմ ավելի պարզ և մատչելի ձևով բացատրել»։