«Կրեմլը Հայաստանը դիտարկում է որպես ապստամբած տարածք, որը պետք է «խելքի բերել»»․ Արման Բաբաջանյան
312
Հինգշաբթի, 01 մայիսի, 2025 թ., 10:54
ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Սերգեյ Կիրիենկոյի՝ Հայաստանի հարցերով Կրեմլի «կուրատոր» նշանակվելը պարզապես կադրային փոփոխություն չէ. սա քաղաքական թելադրված որոշում է՝ Հայաստանը վերածելու Ռուսաստանի ներպետական պրոբլեմի։ Կրեմլն այս կերպ արձանագրում է իր վախը՝ Հայաստանի անկախությունից, եվրոպական կողմնորոշումից և ազատ ապագայի գաղափարից։ Կիրիենկոն պուտինյան ավտորիտար համակարգի ցինիկ ճարտարապետներից է՝ պատասխանատու գրաված տարածքների՝ Դոնբասի, Լուգանսկի, Մարիուպոլի կեղծ ինստիտուցիոնալացման, հիբրիդային կառավարման ու «լոյալ էլիտաների» ստեղծման համար։ Հիմա այդ նույն մեխանիզմն ուզում են գործարկել Հայաստանում՝ կեղծ ընդդիմության աջակցություն, ստվերային ֆինանսական ցանցեր, քարոզչություն, հասարակական մտքի մանիպուլյացիա, ու ի վերջո՝ իշխանազավթում՝ առանց զենքի, բայց նույնքան աղետալի։ Կրեմլի աչքում Հայաստանը դիտարկվում է որպես ապստամբած տարածք, որը պետք է «խելքի բերել»՝ վախի, ճնշման և ներսից հսկողության միջոցով։ Եվ այդ գործիքն է Կիրիենկոն։ Դա նշանակում է, որ 2026-ի ընտրությունները նրանք դիտարկում են որպես հակահեղափոխություն իրականացնելու հնարավոր վերջին պատուհան։ Պատահական չէ, որ գործի է դրվում Կրեմլի ամենապրոֆեսիոնալ ներքին ռեպրեսիվ հենասյունը։ Հայաստանում տեղեկատվական դաշտի վրա վերահսկողությունը, ընդդիմության ճյուղավորումը, պետական ինստիտուտների ներքին զտումները և կոռուպցիոն շղթաների խթանումը լինելու են Կիրիենկոյի առաջիկա առաջնահերթությունները։ Սա հետխորհրդային այլ երկրներում լավ փորձարկված և հստակ իրականացվող տեխնոլոգիա է։ Եվ սա պետք է կանգնեցվի։ Պետք է համարձակորեն ու պետական բարձր մակարդակով արձանագրել՝ Հայաստանի ներքին գործերին որևէ պետության կամ որևէ «աշխատակազմի փոխղեկավարի» ներխուժումը անթույլատրելի է։ Սա քաղաքական ագրեսիա է՝ առանց տանկերի, բայց նույնքան սպառնալիք՝ մեր ինքնիշխանության ու ազգային արժանապատվության համար։ Հայաստանի քաղաքական դաշտը, քաղաքացիական հասարակությունը և հատկապես ժողովրդավարական բոլոր ուժերը պարտավոր են հնչեցնել մեկ ազդակ՝ Կրեմլի ցանկացած փորձ՝ խառնվելու մեր ներքին գործընթացներին, արժանանալու է մերժման, դիմադրության և հակազդեցության։ Մենք չենք պատրաստվում լինել Ռուսաստանի նոր Դոնբասը և չենք պատրաստվում թույլ տալ, որ մեր ընտրությունները, մեր ինստիտուտները, մեր ազատությունը վերածվեն Կիրիենկոյի լաբորատոր քաղաքական փորձադաշտի։ Հայաստանի տեղը ազատ և ինքնիշխան պետությունների ընտանիքում է՝ հիմնված օրենքի գերակայության, ժողովրդավարության և մարդու իրավունքների վրա։ Ոչ մի Կրեմլի «կուրատոր» կամ ստվերային գործիչ չի կարող որոշել մեր պետության ուղին։ Այսօր ավելի քան երբևէ պարտավոր ենք ամրացնել մեր ինքնիշխանությունը՝ հստակ շեշտելով, որ Հայաստանը չի վաճառվելու, չի կառավարվելու և չի ենթարկվելու արտաքին թելադրանքների՝ անկախ դրանց աղբյուրից»:
