«Փորձաքննությամբ մարմնական վնասվածքներ չեն արձանագրվել»․ Արթուր Պողոսյանը՝ Տիգրան Ուլուբաբյանի խոշտանգման դեպքի մասին

ԱԺ «Հայաստան» խմբակցության պատգամավոր Գառնիկ Դանիելյանը ՀՀ Քննչական կոմիտեի նախագահ Արթուր Պողոսյանից հետաքրքրվեց, թե արցախցի Տիգրան Ուլուբաբյանին խոշտանգելու համար պատասխանատվության ենթարկված ոստիկաններ կա՞ն․ «Խոսքը ոչ միայն պատճառած ֆիզիկական ցավի մասին է, այլ նրան հոգեկան տառապանք, նվաստացում պատճառելու։ Արդյո՞ք որևէ ոստիկանի լիազորություններ կասեցվել են, ինչպե՞ս է ստացվել, որ բացակայում են ոստիկանության այդ օրվա տեսագրությունները»,- ասաց Դանիելյանը՝ հետաքրքրվելով, թե արդյո՞ք Տիգրանին բռնության ենթարկած ոստիկանների ինքնությունը պարզվել է։
ՔԿ նախագահի խոսքով ոստիկանների ինքնությունը պարզված է, բոլոր գործողությունները կատարված են, սակայն դատաբժշկական փորձաքննությամբ մարմնական վնասվածքներ չեն արձանագրվել։ Նա հայտնեց, որ այլ փորձաքննություններ են նշանակված՝ հագուստների հետ կապված․ «Սպասենք այդ փորձաքննությունների եզրակացություններին՝ վերջնական իրավական գնահատական տալու համար»,- ասաց Պողոսյանը։