«Առաջինը թող Ալեն Սիմոնյանը գնա Բաքվում ապրի, անձնական օրինակն ամենաազդեցիկն է»․ Արամ Մանուկյան

«Արժե, որ հենց ինքն էլ առաջինը գնա Բաքվում ապրի, անձնական օրինակը ամենաազդեցիկն է, թող Ալեն Սիմոնյանն իր ընտանիքով գնա Բաքու՝ ապրի»,- այս մասին «24Նյուզ»-ի հետ զրույցում նշեց «Հայ ազգային կոնգրես» կուսակցության փոխնախագահ Արամ Մանուկյանը՝ անդրադառնալով այսօր լրագրողների հետ ճեպազրույցի ընթացքում ԱԺ նախագահ Ալեն Սիմոնյանի հնչեցրած մտքին․ «Երբ կլինի խաղաղության պայմանագիր, հայերը կարող են ապրել Բաքվում, մնացածը կարող են վերադառնալ էն գյուղերը, որ ժամանակին ապրել են ՀՀ տարածքում։ Խաղաղության պայմանագիրը կնքելուց հինգ րոպե հետո ՀՀ-ի ու Ադրբեջանի բնակիչները սկսելու են իրար հետ առևտուր անել»։

«Ես դա ռեալ չեմ համարում, միգուցե դա հետոյին է վերաբերում։ Ո՞վ է ապահովելու անվտանգությունը, կա՞ միջազգային ատյան, որ կկարողանա երաշխավոր լինել։ Այս վիճակում, երբ որ չկան միջազգային խաղի կանոններ, քո արկածախնդրությունն ինչի՞ համար է»,- ընդգծեց Մանուկյանը։

«Մեր քաղաքական ուժը միշտ կողմ է եղել հարաբերություններին, մեր կարգախոսը բարիդրացիությունն էր, մենք կողմ ենք դիվանագիտական հարաբերություններին, բայց սեփական ինքնությունը պահպանելով, սեփական բանակը ուժեղացնելով և արժանապատվությունը պահպանելով։ Բայց այդ պայմանագրում արժանապատվություն տեսնո՞ւմ եք, թող իշխանությունը ներկայացնի մի կետ, որով Ադրբեջանը որևէ զիջում է անում, փոխզիջում պետք է լինի, չէ՞, ո՞րն է այդ փոխզիջումը»,- հավելեց Մանուկյանը։