«Մինչև ե՞րբ պետք է սրբապղծությունն ու անարդարությունը ներկայացվեն որպես օրինական գործընթաց»․ Ռոման Երիցյան

Փաստաբան Ռոման Երիցյանի ֆեյսբուքյան գրառումը․ «Սամվել Կարապետյանի կալանավորումը լրացրեց հայկական արդարադատության մատյանի հերթական էջը։ Երբ թվում էր՝ անարդարության հատակը արդեն ծակել են, հայտնվեց մեկը, որը որոշեց ծակած հատակից էլ ներքև ընկնել։
Եվ հիմա, երբ ի հեճուկս հայ ազգի արժանապատվության՝ բարերարը կալանավորված է, իսկ փողոցում կանգնած ժողովուրդը՝ զայրացած, մնում է միայն մի հարց՝ մինչև ե՞րբ։ Մինչև ե՞րբ պետք է սրբապղծությունն ու անարդարությունը ներկայացվեն որպես օրինական գործընթաց։ Մինչև ե՞րբ պետք է արժանապատիվ մարդիկ ազատազրկվեն, որովհետև նրանց հայրենասիրությունը խանգարեց որևէ մեկի օրակարգին։
Այս որոշումը միայն Սամվել Կարապետյանի դեմ չէ։ Սա հարված էր յուրաքանչյուրին, ով դեռ հավատում էր, որ հայերենով գրված Սահմանադրությունը կարող է պաշտպանել հայ մարդուն։ Սա վիրավորանք էր մեզանից յուրաքանչյուրին, ով տեսել է, թե ինչպես է մարդուն հաջողվում գումարից արժեք ստեղծել, ոչ թե արժեքը վերածել գումարի։
Սամվել Կարապետյանն այն մարդն է, ով վերջին 30 տարում ավելի շատ է տվել այս երկրին, քան պետական բյուջեն՝ միասին վերցրած, բայց դե երկրում, որտեղ սրբությունը դարձել է ապրանք, իսկ հայրենասիրությունը՝ մեղադրանք, բարերար լինելը դարձել է վտանգավոր։
Բայց հիշեք՝ չեք խեղդի անունը, որ փրկել է հազարավոր կյանքեր։ Հիմա պատժում եք նրան, հետո պատմությունը կդատի ձեզ։