Միքայել Սրբազանը գալիս է ՔԿ․ ոստիկանական ուժեր են կենտրոնացվել․ ՈՒՂԻՂ ՄԻԱՑՈՒՄ

262

Ուրբաթ, 27 հունիսի, 2025 թ., 17:42

Այս պահին Երևանում Քննչական կոմիտեի մոտ մեծաթիվ ոստիկանական ուժեր են կուտակված, որոնք մի քանի շարքով պատ կազմած կանգնել են կոմիտեի մուտքի մոտ։
Շուտով ՔԿ կհասնի Միքայել Սրբազանը։

Նշենք, որ Շիրակի թեմի առաջնորդ Միքայել Սրբազանը Էջմիածնցի ոտքով շարժվել է դեպի Երևան՝ Քննչական կոմիտե։
Քաղաքացիները թույլ չէին տալիս, որ նա ինքնակամ ներկայանա Քննչական կոմիտե։ Նրանք փակել էին Մայր Աթոռի դարպասները և փորձում էին կրկին Միքայել Սրբազանին ուղեկցել Վեհարան։ Սակայն Սրբազանը հոգևորականների ու քաղաքացիների հետ երթով շարժվեց դեպի Քննչական կոմիտե։

Հիշեցնենք՝ ՀՀ քննչական կոմիտեն հայտարարել է․ « ՀՀ ՔԿ հատկապես կարևոր գործերով քննության գլխավոր վարչությունում քննվող քրեական վարույթի նախաքննության ընթացքում որոշում է կայացվել ՀԱԵ Շիրակի թեմի առաջնորդ Միքայել արքեպիսկոպոս Աջապահյանի (Գևորգ Արտաշեսի Աջապահյան) նկատմամբ ՀՀ քրեական օրենսգրքի 422-րդ հոդվածի 2-րդ մասով հանրային քրեական հետապնդում հարուցելու մասին, այն բանի համար, որ նա զանգվածային լրատվամիջոցների, տեղեկատվական և հաղորդակցական տեխնոլոգիաների օգտագործմամբ, իշխանությունը զավթելուն և սահմանադրական կարգը բռնի տապալելուն ուղղված հրապարակային կոչեր է կատարել»։