«Կարծում ենք՝ քննիչը Արթուր Սարգսյանին ձերբակալելու որոշում կկայացնի»․ Սմբատ Մինասյան

Քննչական կոմիտեն դեռևս Արթուր Սարգսյանի հարցաքննության հետ կապված որոշում չունի։ Այս մասին լրագրողների հետ զրույցում նշեց Արթուր Սարգսյանի փաստաբան Սմբատ Մինասյանը։

«Ազգային ժողովն, ինչպես տեսանք, զրկեց Արթուր Սարգսյանին անձեռնմխելիությունից և համաձայնություն տվեց՝ կալանավորման հետ կապված։ Գործող կարգի համաձայն՝ այդ որոշումները Ազգային ժողովը պետք է ուղարկի Գլխավոր դատախազություն և նշված քրեական վարույթով հսկող դատախազը որոշում է կայացնելու անձին հանրային քրեական հետապնդում հարուցելու մասին․․․ Քննչական մարմինը հանրային քրեական հետապնդում հարուցելու մասին որոշումը ներկայացնելու է Արթուր Սարգսյանին։ Արթուր Սարգսյանն էլ դրա հիման վրա ցուցմունք է տալու, բայց քանի որ դատարան տանելու համար պետք է ձերբակալվի, կարծում ենք, որ քննիչը նաև ձերբակալելու որոշում կկայացնի։ Ձերբակալման որոշումը հանձնարարվելու է ոստիկանությանը կամ ԱԱԾ-ին։ Ամեն պահի սպասում ենք, որ ԱԱԾ-ն կամ ոստիկանները կգան, կներկայացնեն որոշումը և կձերբակալեն Արթուր Սարգսյանին և նրան կներկայացնեն քննչական մարմին»,- պարզաբանեց փաստաբանը։