«Աղետ բերող ծաղրածուն մեղադրում է Լևոն Տեր-Պետրոսյանին»․ Լևոն Զուրաբյան

ՀԱԿ փոխնախագահ Լևոն Զուրաբյանի գրառումը՝ կից տեսանյութով․ ««Միայն սխալվելու մեր համարձակությունն է, որ ճշմարտության ետեւից գնալու վճռականություն կտա ու Հայաստանին կբերի նորանոր հաղթանակներ: Միայն պարտվելու համարձակությունն է, որ մեզ կբերի հաղթանակի»:
Այս խոսքի հեղինակը Նիկոլ Փաշինյանն է՝ Հայաստանի ներկայիս վարչապետը:
Այս խոսքն ասվել է արցախյան 44-օրյա պատերազմից ընդամենը 9 օր առաջ «Սխալվելու վճռականությունը՝ ճշմարիտ ճանապարհ» վերնագրված հոդվածում: Թե ինչ հաղթանակ մեզ բերեց «պարտվելու համարձակությունը», մենք բոլորս գիտենք և դեռ երկար ենք ճաշակելու այդ «հաղթանակի» դառնությունը:
Այս մեջբերմանը անդրադարձա միայն մեկ նպատակով՝ ցույց տալու Հայաստանի այսօրվա ղեկավարի մենթալիտետի գլխավոր առանձահատկությունը, որի շնորհիվ սխալն իր գլխում դառնում է «ճշմարտություն», պարտությունը՝ «հաղթանակ», իսկ ագրեսորի ախորժակի ժամանակավոր զսպումը՝ «խաղաղություն»:
Փաշինյանի մենթալիտետի ընկալման համար կարևոր է նաև հետևյալ հանճարեղ միտքը, որ նա ասել է 2024 թվականին Գավառ այցելության ժամանակ. «Երբ բախվում ենք իրականությանը, տեսնում ենք, որ իրականությունը մեր պատկերացումներից կտրված է»: Նկատեք՝ ոչ թե «մեր պատկերացումներն են կտրված իրականությունից», այլ «իրականությունն է կտրված մեր պատկերացումներից»:
Իրականության՝ իր պատկերացումներից «կտրված լինելու» մի օրինակ էլ Փաշինյանը բերել է 44-օրվա պատերազմի ժամանակ, հոկտեմբերի 14-ին, երբ նա որպես «տարօրինակ հանգամանք» էր ներկայացնում այն իրողությունը, որ «ռազմավարական զսպման հնարավորություն ունեցող մի շարք երկրներ պատշաճ չգնահատեցին վտանգը» և թույլ տվեցին Հայաստանի դեմ պատերազմը:
Փաստորեն, ըստ Փաշինյանի, աշխարհաքաղաքական իրողություններն այդ օրերին նույնպես «կտրվել էին» իր պատկերացումներից: Եվ հիմա իրականության հետ մշտապես իր կապը կորցնող և դրա պատճառով ամեն անգամ մեր վրա մի նոր աղետ բերող այս ծաղրածուն մեղադրում է «իրականության հետ կապը կորցնելու» մեջ Տեր-Պետրոսյանին՝ այն միակ քաղաքական գործչին, որը հասկանում էր արցախյան խնդրի չլուծված լինելու ու Ադրբեջանի հետ կործանարար պատերազմի վտանգը:
Իրականությանը ոչ ադեկվատ Նիկոլ Փաշինյանի, նրա թիմակիցների և քարոզիչների ստերի և խարդախ մանիպուլյացիաների մասին, ինչպես նաև այն մասին, թե ովքեր իրավունք ունեն կոչվելու «խաղաղության կուսակցություն»՝ Ռուզան Խաչատրյանի հետ հարցազրույցում»: