«Պետության կործանումը խափանելու միակ ճանապարհը Փաշինյանին իշխանությունից հեռացնելն է»․ Էդգար Ղազարյան

Հասարակական, քաղաքական գործիչ Էդգար Ղազարյանի ֆեյսբուքյան գրառումը․ «Վարչապետին անվստահություն չհայտնող «ընդդիմադիր» պատգամավորներն աղաղակում են իրենց նկատմամբ հետապնդումների, խուզարկությունների, ձերբակալությունների, կալանավորումների մասին։ Հավանաբար, ակնկալում էին, որ իրենց պարտականությունների կատարումից խուսափելու և անվստահություն չհայտնելու պարագայում, պետք է արժանանային խրախուսանքների, պարգևների և հավելյալ պարգևավճարների։
Ժամանակին պետք է գիտակցեին, որ Նիկոլ Փաշինյանի իմպիչմենտ հայտնելու գաղափարին միանալու, այն ամեն գնով առաջ մղելու գործողությունները, այդ ուղղությամբ միասնական ջանքերով անզիջում պայքարը առաջին հերթին բխում է իրենց իսկ շահերից, այլ ոչ թե թիրախավորում է իրենց, ինչպես անմտորեն փորձում են առաջի օրից ներկայացնել։ Դա միակ վահան է, որ պաշտպանելու է ոչ միայն երկիրը, այլև հենց իրենց։
Անվստահության գործընթացն «անլուրջ» համարող մարդիկ, ովքեր, իրենց խելքով, նաև ծաղրում էին այդ գաղափարի հեղինակներին, այդ թվում ինձ, հիմա, կարծում եմ, հասցրել են լրջանալ ու լուրջ են վերաբերվում իրենց ձերբակալություններին ու հալածանքներին, որոնք կարող էին չլինել, եթե նրանք, ի սկզբանե, այդ ամենին վերաբերվեին պատասխանատվությամբ և ինչ-որ մի պահից կանգնեցին ձախողումների իրենց անվերջանալի ընթացքը։
Մեր պետության կործանումը խափանելու միայն մեկ ճանապարհ գոյություն ունի՝ Նիկոլ Փաշինյանին հեռացնելը իշխանությունից։ Նիկոլ Փաշինյանին իշխանությունից հեռացնելու միայն մեկ ճանապարհ գոյություն ունի՝ իմպիչմենտ։
Քանի դա չեք գիտակցել, գնացեք ու լուռումունջ, ու ամենակարևորը՝ լուրջ դեմքերով, շարվեք քննչականների ու դատարանների պատերի տակ»։