«Իրանի տարածքի մեծ մասը առաջիկա 40 տարիներին կարող է ուղղակի անապատ դառնալ». Վարդան Բալյան
320
Կիրակի, 20 հուլիսի, 2025 թ., 18:48
Քաղաքական վերլուծաբան Վարդան Բալյանի ֆեյսբուքյան գրառումը․ «Իրանցի օգտատերերից մեկի գրառումն է՝ «մենք վերադառնում ենք քարե դար և կարծես մոտենում ենք հանդեսի ավարտին»: Հարևան Իրանում էլեկտրաէներգիայի մատակարարումների զանգվածային խափանումներ են, տևական ժամանակով անջատումներ բազմաթիվ բնակավայրերում ամբողջ երկրով մեկ: Լրջագույն խնդիր է դարձել ջրի դեֆիցիտը: Թեհրանի համալսարանի պրոֆեսոր Բենեֆշե Զահրային իր հարցազրույցում նշել է, թե հաջորդող երկու շաբաթները վերջին հնարավորությունն են՝ դիմանալու առաջիկա երկու ամիսներին: Բնապահպան Մանսուր Սոհրաբիի գնահատականով անընդմեջ 5 երաշտային տարիները, աննախադեպ շոգ եղանակն այս ամռանը բառի ուղիղ իմաստով ճգնաժամային իրավիճակ են ստեղծել: Բարդագույն իրավիճակ է ոռոգման համակարգում: Բնապահպան Ազամ Բահրամիի գնահատմամբ երկրում ոռոգման համակարգի ճգնաժամը արդեն իրողություն է, գրունտային ջրերի չափից ավելի օգտագործման արդյունքում Իրանի տարածքի մեծ մասը առաջիկա 40 տարիներին կարող է ուղղակի անապատ դառնալ: Տնտեսագետները հաղորդում են պետական եկամուտների կտրուկ ու էական նվազման մասին: Բյուջեի կանխատեսվող դեֆիցիտը տնտեսագետների մեծ մասի և նույնիսկ որոշ պատգամավորների հրապարակային գնահատականներով կարող է հանգեցնել կառավարման ճգնաժամի: Պատկերացնելու համար իրավիճակը բավական է նշել, որ 12-օրյա պատերազմից հետո հարկային եկամուտների հավաքագրումը կազմել է ծրագրված ցուցանիշի 10 տոկոսը միայն: Արդեն առիթ ունեցել եմ գրել Իսլամական հանրապետությունում ներքաղաքական պայքարի սրացման մասին: Քաղաքական ճգնաժամը հանրաքվեի միջոցով հանգուցալուծելու առաջարկով հրապարակային հանդես է եկել ընդդիմության առաջնորդներից Միր Հոսեյն Մուսավին, ում կոչին միացել են ավելի քան 800 հայտնի քաղաքացիական և քաղաքական գործիչներ: Հատկանշական է, որ ընդդիմադիր տրամադրված հանրային շերտերը և գործիչների մեծ մասը, որոնց տեսաեկտը հրապարակայնացրեց Խաղաղության Նոբելյան մրցանակակիր Շիրին Էբադին, հանրաքվեի անցկացման նախապայման են նշում իսլամական ռեժմի տապալումը, իսկ որպես կոմպրոմիսային տարբերակ ՄԱԿ-ի երկարաժամկետ դիտորդական առաքելությունը հանրաքվեի նախապատրաստման և անցկացման շրջանում: Հասկանում եմ, որ երկար է ստացվում, բայց մեր լրատավկան ու հանրային հարթակներում Իրանում և նրա շուրջ տեղի ունեցող զարգացումներին շատ քիչ են անդրադառնում՝ չնայած հանգամանքին, որ այդ երկրում ներքաղաքական անկայունության և Իրանի թուլացման շահառուները մեր անմիջական երկու հարևաններն են: Պետք է հաշվի առնել նաև, որ Հայաստանի Հանրապետությունը Իսլամական հանրապետության հետ անմիջականորեն սահմանակից պետություն է, հետևաբար, հնարավոր սոցիալական ու քաղաքական բունտերը, հումանիտար ճգնաժամը ուղղակիորեն առնչվելու է մեզ: Լրացուցիչ մեկնաբանությունները ավելորդ եմ համարում»:
