«Վարձակալողը կարող է լինել ԱՄՆ-ի ռազմականացված կառույց». Խոսրով Հարությունյան

«Ես սկզբունքորեն դեմ եմ Սյունիքով Ադրբեջանը Նախիջևանին կապուղի տրամադրելուն»,- «24Նյուզ»-ի հետ զրույցում ասաց ՀՀ նախկին վարչապետ Խոսրով Հարությունյանը՝ անդրադառնալով տրանսպորտային հաղորդակցությունների ապաշրջափակմանը։ «Դեմ եմ երկու հիմնական պատճառով։ Առաջին՝ դա որևէ աղերս չունի Հայաստանի ապաշրջափակման հետ։ Երկրորդ՝ դրանով Հայաստանն ավելի է խորացնում իր շրջափակումը։ Ինչո՞ւ, որովհետև այդ կապի հաստատման պարագայում, այն էլ եթե ԱՄՆ-ն ինչ-որ պատասխանատու դերակատարում ստանձնի, Հայաստանը զրկվելու է իր ամենակարևոր դաշնակցի՝ Իրանի հետ ուղղակի կապից»,- նշեց Հարությունյանը՝ անդրադառնալով նաև ճանապարհի արտապատվիրակման վերաբերյալ լուրերին․ «ԱՄՆ-ն պատահական չի սկսել մտածել, որ կարող է դերակատարում ունենալ, այն էլ 100 տարով վարձակալության վերցնել։ Ի դեպ վարձակալող կազմակերպությունը դա հեռադիտակներով քաղաքացիական մարդիկ չեն լինելու, դա կարող է լինել ԱՄՆ-ի որևէ մասնավոր ռազմականացված կառույց»,- ասում է Հարությունյանը՝ նշելով, որ դա նշանակում է աշխարհաքաղաքական նոր դերակատարի ներգրավում ՀՀ տարածքում և որի արդյունքում դառնալու ենք խոշոր խաղացողների մարտադաշտ։