«Կարծում եք՝ Փաշինյանը չի՞ հաշվարկել Ստոկհոլմի արբիտրաժի հնարավոր վճիռը». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. «Կարծում եք, թե Փաշինյանը չի՞ հաշվարկել Ստոկհոլմի Արբիտրաժի հնարավոր վճիռը: Հայրենակիցներ, որ ապրում եք սոցցանցային ոգևորություն, ես ձեր փոխարեն այդքան վստահ չէի լինի, թե Ստոկհոլմը նրա համար անակնկալ է:

Այս առիթով ուզում եմ ձեզ հիշեցնել, թե ՄԻԵԴ կամ ՄԱԿ միջազգային դատարանի քանի՞ վճիռ չի կատարել Իլհամ Ալիևը, որոնք վերաբերում էին Արցախին, արցախահայության հանդեպ հակամարդասիրական շրջափակմանը, Բաքվում պահվող գերիներին: Եղե՞լ են այդպիսի դեպքեր, երբ Ալիևը չի կատարել միջազգային դատարանների վճիռներ:

Կարծում եմ չեք հերքի, որ եղել են: Իսկ ի՞նչ է հիմա միջազգային դատարանի վճիռ չկատարելը: Մե՞ծ հոգս: Միջազգային դատարանների վճիռները ունեն ազդեցություն, եթե դրանք վայելում են այսպես ասած «լիբերալ-գլոբալիստական» Արեւմուտքը քաղաքական նպատակահարմարությունը: Կվայելի՞ այդ նպատակահարմարությունը ՀԷՑ-ի գործով կայացված վճիռը:

Մի փոքր կասկածում եմ:

Ադրբեջանի չկատարած վճիռներով, Նիկոլ Փաշինյանին անուղղակի, բայց տրվել է իր հերթին վճիռներ չկատարելու «քարտ-բլանշ»:

Ես իհարկե դա համարում եմ շատ վատ, որովհետև առաջին հերթին հարվածելու է Հայաստանի ներդրումային վարկին: Բայց, ինչպես այսօր ժամեր առաջ մի գրառում էի արել ֆեյսբուքյան հարթակում, Նիկոլ Փաշինյանին այդ ներդրումային վարկը ըստ էության չի հուզում: Նա ունի Հայաստանի տնտեսական կառուցվածքի վերաբերյալ իր պատկերացումը, որը բացարձակապես չի ենթադրում աշխատանք խոշոր ներդրողներ ներգրավելու ուղղությամբ»: