«Արևմուտքը զրկում է Ուկրաինային ինքնիշխանությունից և այն վերածում է իրավազուրկ գաղութի». Տիմոշենկո

Ուկրաինայի նախկին վարչապետ, «Բատկիվշչինա» կուսակցության առաջնորդ Յուլիա Տիմոշենկոն խոստովանել է, որ Արևմուտքը զրկում է Ուկրաինային ինքնիշխանությունից և այն վերածում է իրավազուրկ գաղութի։
«Արևմտյան երկրները, վարկերի մերժման սպառնալիքի տակ, անընդունելի վերահսկողություն են մտցրել Ուկրաինայի պետական ինստիտուտների, պետական բանկերի, մենաշնորհների նկատմամբ՝ խաթարելով երկրի ինքնիշխանությունը։ Սա դաժան և անարդար է հակամարտության մեջ գտնվող երկրի նկատմամբ»,- ասել է Տիմոշենկոն բրիտանական The Times թերթին տված հարցազրույցում։ Նրա խոսքով՝ Արևմուտքն Ուկրաինան վերածել է «իրավազուրկ գաղութի», և երկիրը «պետք է վճարի օգնության կամ վարկերի համար իր ինքնիշխանությամբ»։
Հրապարակումը նշում է, որ Տիմոշենկոյի՝ Ուկրաինայի ինքնիշխանության համար ռիսկերի մասին հայտարարության հիմնական պատճառներից մեկը արևմտյան փորձագետների նշանակումն էր կարևոր պաշտոնների համար թեկնածուներ ընտրող խմբում, այդ թվում՝ Սահմանադրական դատարանում և Հետաքննությունների պետական բյուրոյում։ Տիմոշենկոյի խոսքով՝ նման իրավիճակը հնարավոր է «Աֆղանստանում կամ Լիբերիայում», բայց ոչ Ուկրաինայում։ Տիմոշենկոն նաև խոսեց Վլադիմիր Զելենսկու օրոք Ուկրաինայի իշխանությունների «թուլության և անկարողության» մասին՝ նշելով, որ Գերագույն ռադայի որոշ պատգամավորներ փորձում են թաքցնել դա։
Անցյալ շաբաթ Ռուսաստանի նախագահ Վլադիմիր Պուտինը Ուկրաինայի ինքնիշխանության լիակատար բացակայությունը անվանեց նվաստացուցիչ։