«Նախկին արտգործնախարարներից ոչ մեկը չէր կարող ավելին ստանալ»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Հայաստան-Ադրբեջան թուղթը, որ նախաստորագրվեց Վաշինգտոնում, Բաքուն, ամենայն հավանականությամբ, չի ստորագրելու, քանի դեռ Երևանը չի կատարել ադրբեջանական բազմաթիվ պահանջներից ևս մեկը՝ Սահմանադրության փոփոխությունը:
Դա նշանակում է, որ առնվազն ևս մեկ տարի է անհրաժեշտ, որպեսզի Հայաստան-Ադրբեջան արյունոտ հարաբերությունների էջը փակվի և բացվի նոր էջ:
Այդ մեկ տարվա ընթացքում Հայաստանի համար կարևոր են հետևյալ հարցերը.
ա/ Թուրքիան բացելո՞ւ է սահմանը Հայաստանի հետ, թե շարունակելու է ինքնակամ պատանդ մնալ Ադրբեջանի ցանկություններին,
բ/ Ռուսաստանը ինչպես է իրեն դիրքավորելու Հայաստանի հետ հարաբերություններում, հատկապես տնտեսական հարցերում,
գ/ Ինչպիսին է լինելու մեր հարավային հարևան Իրանի կեցվածքը,
դ/ Ադրբեջանը դուրս գալու է՞ Հայաստանի գրավյալ հողից, որի մասին Երևանը հրապարակային չի խոսում այլևս, իսկ Բաքուն պատրաստում է հիմնավորումներ ներխուժած ամեն մի տարածքի "ադրբեջանականությունը" հիմնավորելու համար, այդ թվում՝ քարտեզներ,
Անշուշտ, հարցերը շատ ավելին են, բայց Հայաստանի պետական շահը վեր է ամեն ինչից:
Որևէ համաձայնագիր գնահատելու համար պետք է ելակետ ընտրել օրվա վիճակը, քո հնարավորությունները և միջազգային կացությունը:
Ես, անձնապես, չեմ քննադատում Վաշինգտոնում ստորագրված թուղթը, քանի որ այսօր մենք ավելին ստանալ չէինք կարող:
Մենք կարող ենք քննարկել, թե ինչու այսպես եղավ, բայց, կասկած չունեմ, որ Հայաստանի նախկին արտգործնախարարներից ոչ մեկը չէր կարող ավելին ստանալ, քան բանակցել է Արարատ Միրզոյանը:
Ճիշտ այնպես, ինչպես Բաթումում հարյուր տարի ավելի առաջ ստացան Քաջազնունին ու Խատիսյանը, ավելին չէին կարող ստանալ այլ բանակցողներ:
Եթե մենք ուզում ենք Ադրբեջանի հետ հարաբերություններում ավելի ամուր դիրքերից հանդես գալ, ապա մեզ համար առաջնահերթ են.
ա/ Հայաստանի տնտեսության զարգացումը և Թուրքիայի ճանապարհի բացումը,
բ/ Հայաստանի աղետալի ժողովրդավարության բարելավումը և համաչափ զարգացումը,
գ/ երրորդ երկրներից Հայաստանի կախման նվազումը:
Աստված պահապան Հայաստանի Հանրապետությանը»: