Ուրբաթ, 29 օգոստոսի, 2025 թ.
|
Ստեփանակերտում`   +29 °C

«Պաշտոնից հետո խորհրդական նշանակվելը դիտվում է որպես «մխիթարական» նշանակում»․ Հակոբ Բադալյան

«Պաշտոնից հետո խորհրդական նշանակվելը դիտվում է որպես «մխիթարական» նշանակում»․ Հակոբ Բադալյան
53
Այսօր, 10:36

Քաղաքական մեկնաբան Հակոբ Բադալյանի թելեգրամյան գրառումը․ «Լիլիթ Մակունցին Նիկոլ Փաշինյանը նշանակում է վարչապետի խորհրդական:

Երբ դեռ մամուլի տեղեկության մակարդակով խոսվեց այն մասին, որ Մակունցին կփոխարինի սոցապ նախարար Մկրտչյանը, ես գրառում արեցի, որ հետաքրքիր է լինելու՝ ԱՄՆ-ում ավելի քան չորս տարի դեսպան աշխատած Լիլիթ Մակունցը կստանա նոր դիվանագիտական նշանակո՞ւմ, թե՞ կներգրավվի ներքին պրոցեսներում:

Վարչապետի խորհրդականի հանգամանքը սակայն կարծես թե ավելի անորոշ կարգավիճակ է, դե ֆակտո իմաստով: Սովորաբար, երբ որեւէ անձի իր պաշտոնից հետո նշանակում են խորհրդական, դա դիտվում է որպես «մխիթարական» նշանակում: Իմիջայլոց, հիշենք այդ առիթով ամենազավեշտալին, երբ Փաշինյանը պաշտոնանկ արեց Լոռու մարզպետին, հետո նրան նշանակեց իր խորհրդական: Լրագրողները հարցրին, թե ի՞նչի մասին է խորհուրդ տալու Փաշինյանին, նորանշանակը պատասխանել էր, թե դեռ չգիտե, աշխատելուց կիմանա:

Լավ, վերադառնանք ԱՄՆ նախկին դեսպան Լիլիթ Մակունցի նշանակմանը: Երբ նա նշանակվեց դեսպան չորս տարի առաջ, մամուլում եղավ տեղեկություն, որ հենց ԱՄՆ վարչակազմն էր Նիկոլ Փաշինյանին հորդորել դեսպան նշանակել իր համար վստահելի մարդու: Հիշեցնեմ, դա դեմոկրատական վարչակազմն էր, որն ուներ թերեւս Հայաստանի իշխանության հետ կոմունիկացիայի իր հաշվարկները:

Այստեղ ուզում եմ ձեր ուշադրությունը դարձնել այսօր եղած մի հանգամանքի: Խորհրդանշանական զուգահեռով, Լիլիթ Մակունցին խորհրդական նշանակելու մասին Նիկոլ Փաշինյանը հայտարարում է նույն օրը, որ օրը նա հանկարծ դժգոհեց ԱՄՆ դեմոկրատական վարչակազմից՝ Օ Բրայանի հոդվածի առիթով, ասելով, որ այդ վարչակազմի գործունեության ընթացքում պաշտոնական Երեւանը գոհ չի եղել հայ-ադրբեջանական ուղղությամբ դեմոկրատների աշխատանքից:

Եվ այստեղ հարց է առաջանում, գուցե հռետորական՝ իսկ արդյո՞ք Նիկոլ Փաշինյանը այդ «դժգոհության» փաթեթի մեջ չի դիտարկում նաև դեսպան Մակունցին, որն իհարկե դեմոկրատական վարչակազմի պաշտոնյա չէ՝ Հայաստանի պաշտոնյա է, բայց կարծես թե իր պաշտոնավարման ընթացքում նպաստել էր դեմոկրատների վրա խաղադրույք կատարելուն:

Հնարավոր է, որ Մակունցի հանդեպ դժգոհություն Փաշինյանը չունի և խորհրդականի պաշտոնը ոչ թե «մխիթարական» է, այլ անմիջական գործնական և ԱՄՆ-ում նախկին դեսպանը աստիճանաբար ակտիվորեն կներգրավվի ներքին պրոցեսներում, այդ թվում առանձիին իմաստով նաեւ ներիշխանական, իսկ վարչապետի խորհրդականի պաշտոնը նրա համար կլինի ադապտացիայի հարմար գոտին:

Ի դեպ, ներիշխանական հանգամանքը թերեւս ունի հատուկ ուշադրության կարիք, քանի որ այստեղ Նիկոլ Փաշինյանը կարծես թե զգում է բաժանարար գծերի որոշակի տագնապ, ինչը մատնեց թերևս նրա բավականին կտրուկ արձագանքը ՀԵՑ-ի միջազգային արբիտրաժի հանդեպ կառավարությունում հնչող դիրքորոշումների մասին հարցին: Նիկոլ Փաշինյանը թվում է թե հանգիստ մի հարցին տվեց բավականին անհանգիստ պատասխան, հայտարարելով, թե այդ ո՞վ կարող է կառավարությունում չկիսել իր կարծիքը, չէ՞ որ՝ «կառավարությունը ես եմ», էմոցիոնալ հայտարարեց Փաշինյանը, ըստ էության թքած ունենալով ՀՀ Սահմանադրության 147 հոդվածի վրաГ:

Աղբյուրը`   Հակոբ Բադալյան