«Կոռուպցիոն թեմայի կասկածով մի ամբողջ վարչություն եմ գրեթե լուծարել»․ Տիգրան Ավինյան

Երևանի քաղաքապետ Տիգրան Ավինյանն ասուլիսի ժամանակ, անդրադառնալով քաղաքապետարանի աշխատակիցների ձերբակալություններին, նշեց, որ հակակոռուպցիոն գործողությունները թափ են առել հատկապես իր՝ քաղաքապետ դառնալուց հետո։ «Մեր իրավապահ համակարգի գործընկերների հետ պարբերաբար ունեցել ենք խորհրդակցություններ և մեր տեղեկությամբ տեղի են ունեցել գործողություններ։ Բայց ունեցել ենք նաև դեպքեր, որի հետ ընդհանրապես համաձայն չենք եղել»,- ասաց Ավինյանը՝ նշելով, որ ինքն է «նախահարձակ» եղել՝ կոռուպցիոն դեպքերը բացառելու նպատակով․ «Կոռուպցիոն թեմայի կասկածով ես մի ամբողջ վարչություն եմ գրեթե լուծարել, վարչության գրեթե բոլոր աշխատակիցները դիմում են գրել»,- հավելեց Ավինյանը՝ չմանրամասնելով, թե որ վարչության մասին է։