Ռուսաստանում հայտնաբերվել է նախկինում անհայտ ավելի քան 60 վիրուս

15271

Կիրակի, 23 նոյեմբերի, 2025 թ., 13:39

Ռուսաստանում հայտնաբերվել է նախկինում անհայտ ավելի քան 60 վիրուս, հայտնել է Ռոսպոտրեբնադզորի Վիրուսաբանության և կենսատեխնոլոգիաների «Վեկտոր» պետական գիտական կենտրոնի ղեկավար Ալեքսանդր Աղաֆոնովը։

Նա նշել է, որ ցանկանում են հայտնաբերել բոլոր վիրուսները, որոնք տարածված են ՌԴ-ում, և կարևոր է գտնել ոչ միայն բոլոր առկա վիրուսները, այլև այն վիրուսները, որոնք հատկապես ախտածին են մարդկանց համար։ «Ավելի քան 50 դաշնային սուբյեկտներ արդեն ուղարկել են մեզ իրենց նմուշները։ Մենք արդեն մեկուսացրել ենք ավելի քան 60 նոր, նախկինում անհայտ վիրուսներ և ուսումնասիրել դրանց գենետիկական կառուցվածքը», - ասել է նա «Զոլոտայա Դոլինա» գիտաարդյունաբերական ֆորումում։

Նա նշել է, որ դա տեղի է ունեցել համաշխարհային համավարակների կանխարգելման աշխատանքների ընթացքում։ «Մեր հիմնական խնդիրն այժմ պարզելն է, թե որքան արագ կզարգանան այս վիրուսները, ինչի կվերածվեն և արդյոք մենք ի վերջո կստանանք համավարակի հատկություններով շտամ։ Սա շատ բարդ խնդիր է», - ասել է Աղաֆոնովը։