«Հայաստանի և Ադրբեջանի սահմանի երկայնքով կատարյալ խաղաղություն է»․ Նիկոլ Փաշինյան

«Արտաքին հետախուզության տարեկան զեկույցում ընդգծվում է, որ Հայաստանի և Ադրբեջանի միջև ռազմական էսկալացիայի հնարավորությունը գնահատում է որպես «գրեթե անհավանական»։ Այսինքն՝ սա արձանագրում է, որ Հայաստանի և Ադրբեջանի միջև հաստատված է խաղաղություն»,- այս մասին ԱԺ-ում կառավարության հետ հարցուպատասխանի ժամանակ հայտարարեց վարչապետ Նիկոլ Փաշինյանը։

Անդրադառնալով Ադրբեջանի ռազմական բյուջեի աճի վերաբերյալ հարցին՝ Փաշինյանը քննադատեց սպառազինությունների մրցավազքի մեջ մտնելը՝ կարծիք հայտնելով, որ, օրինակ, ԽՍՀՄ-ը փլուզվել է նաև սպառազինությունների ինքնամոռաց մրցավազքի մեջ մտնլու հետևանքով։

«Մենք մեր երկրի պաշտպանունակությունը սիստեմատիկ կերպով ավելացնում ենք և կարող եմ ասել, որ հաջողությամբ ենք դա իրականացնում։ Ինչ վերաբերում է խաղաղության հետագա ամրապնդմանը և դրա ինստիտուցիոնալացման հարցերին, մենք այդ ուղղությամբ շարունակում ենք դիվանագիտական աշխատանքները․․․ ՀՀ-ն ոչ մի վայրկյան չի կորցնում զգոնությունը, բայց 2026 թվականի հունվարի 21-ի դրությամբ՝ Հայաստանի և Ադրբեջանի սահմանի երկայնքով կատարյալ խաղաղություն է»,- ընդգծեց Փաշինյանը։