ԱՄՆ-ում մոտ 10000 չվերթ չեղարկվել է մոտեցող փոթորկի պատճառով

ԱՄՆ-ում շաբաթավերջին նախատեսված մոտ 10000 չվերթ չեղարկվել է այսօր երկրի մեծ մասում ակնկալվող ավերիչ ու հզոր փոթորկի պատճառով, որը մեծացնում է էլեկտրաէներգիայի բազմօրյա անջատումների և խոշոր մայրուղիների սառցակալման վտանգը, հաղորդում է Associated Press-ը։

Մոտ 140 միլիոն մարդու, կամ ԱՄՆ-ի բնակչության ավելի քան 40%-ի համար, ձմեռային փոթորկի նախազգուշացում է տրվել Նյու Մեքսիկոյից մինչև Նոր Անգլիա։ Ազգային օդերևութաբանական ծառայությունը նախազգուշացնում է լայնածավալ առատ ձյան և արևելյան Թեքսասից մինչև Հյուսիսային Քարոլինա տարածվող աղետալի սառցակալման մասին։ Ամբողջ երկրում արդեն հաղորդվել է ավելի քան 95000 էլեկտրաէներգիայի անջատման մասին։

FlightAware թռիչքների հետևման կայքի տվյալներով՝ շաբաթ օրը տեղական ժամանակով ժամը 10:00-ի դրությամբ չեղարկվել էր ավելի քան 3400 չվերթ։ Կիրակի օրը չեղարկվել է գրեթե 6200 չվերթ։