«Օրենսդիրներն էլ, գործադիրում էլ պաշտոններ զբաղեցնողներն օրենքով իրավունք ունեն տգետ լինելու»․ Արման Մելիքյան

Արցախի ԱԳ նախկին նախարար Արման Մելիքյանի ֆեյսբուքյան գրառումը. «Վերջերս ԱԺ հանձնաժողովներից մեկի նախագահի ընտրությունների հետ կապված մեծ աղմուկ էր բարձրացել: Ասում էին, որ թեկնածուն բարձրագույն կրթություն չունենալով՝ պետք է ղեկավարի լուրջ, մասնագիտական որակներ նախատեսող պրոֆիլային մի հանձնաժողով: Այդ կնոջն, այնուամենայնիվ, ընտրեցին, շատ չանցած նա ինչ-ինչ պատճառներով հրաժարական տվեց ու, կարծեմ, նաև որոշեց վերջ դնել իր քաղաքական գործունեությանը: Ինքս գտնում եմ, որ նեղ մասնագիտական ոլորտների օրենսդրական կարգավորումով զբաղվող օրենսդիր կառույցների ղեկավարները, և ոչ միայն նրանք, պետք է ունենան մասնագիտական բարձրագույն կրթություն: Բայց, ըստ մեր սահմանադրության, ՀՀ ԱԺ պատգամավորը պարտադիր չէ, որ «բարձրագույնավարտ» լինի: Այդուհանդերձ, շատ ավելի վատ է այն, որ կրթական ցենզ սահմանված չէ նաև ՀՀ վարչապետի ու կառավարության անդամների համար, քանի որ այդ պաշտոնները զբաղեցնողները պետք է համապատասխանեն պատգամավորին օրենքով ներկայացվող պահանջներին: Իսկ բարձրագույն կրթություն ունենալը, այո, այդ պահանջների ցանկում չկա: Փաստորեն, օրենքի տեսակետից, այդ թեկնածուին հետ պատահածը խտրականության դրսևորում էր՝ մեր երկրի օրենսդիրներն էլ, գործադիրում բարձրագույն պաշտոններ զբաղեցնող մարդիկ էլ օրենքով իրավունք ունեն տգետ լինել:
հոդված 48. Ընտրական իրավունքը եւ հանրաքվեին մասնակցելու իրավունքը
2. Ազգային ժողովի պատգամավոր կարող է ընտրվել քսանհինգ տարին լրացած, վերջին չորս տարում միայն Հայաստանի Հանրապետության քաղաքացի հանդիսացող, վերջին չորս տարում Հայաստանի Հանրապետությունում մշտապես բնակվող, ընտրական իրավունք ունեցող եւ հայերենին տիրապետող յուրաքանչյուր ոք:
Հոդված 148. Կառավարության անդամին ներկայացվող պահանջները
1. Կառավարության անդամը պետք է բավարարի պատգամավորին ներկայացվող պահանջները»: