«Ուրախանում ենք ինչ-որ այցերով, բայց այն, ինչ մեզ սպառնում է, սարսափելի է». Սևակ Հակոբյան

Լրագրող, խմբագիր Սևակ Հակոբյանի ֆեյսբուքյան գրառումը՝ կից տեսանյութով․ «Այնքան տարածքի վրա, որ մեզնից խլել է Ադրբեջանը, աշխարհում ձևավորվել է 5 պետություն
Ավարտվեց ԱՄՆ-ի փոխնախագահ Ջեյ Դի Վենսի այցը Հայաստան և Ադրբեջան։ Եթե աղմուկը, որոշների ոգևորությունը դնենք մի կողմ, իրականում ի՞նչ ունենք, բացի Հայաստանի՝ ԱՄՆ-ից 9 մլրդ դոլարի գնում անելը։
Հանրության սպասելիքն էր, որ ԱՄՆժի փոխնախագահը Բաքվում բարձրացնի Հայաստանի ավելի քան 200 քառակուսի կիլոմետր տարածքի օկուպացիայի հարցը, ինչպես նաև հայ գերիների հարցը։
Քաղցր ելույթներից ոգևորվողները տեղեկացա՞ն, թե երբ է ավարտվելու օկուպացիան։ Հայաստանից այս պահին ավելի շատ տարածք է օկուպացրել Ադրբեջանը, քան Վատիկան, Մոնակո, Նաուրու, Սան Մարինո և Լիխտենշտեյն պետությունները միասին վերցրած։ Այնքան տարածքի վրա, որ մեզնից խլել է Ադրբեջանը, աշխարհում ձևավորվել է 5 պետություն։
Իր տարածքների մասին չբարձրաձայնելով՝ Հայաստանի ղեկավարությունը խրախուսում է Ադրբեջանին նոր օկուպացիա անել։ Սրանք առավոտից իրիկուն խոսում են ինքնիշխանության մասին․ 200 քառակուսի կիլոմետր հանձնել եք, ի՞նչ ինքնիշխանություն։
Ընդ որում, բանակցություններում այդ հարցը չկա, իսկ բանակով վերադարձնելու խնդիր չի դրել․ դե որովհետև բանակից թողել է «բ» տառը։ Ադրբեջանն Ամերիկայից զենքեր է ստանում, Հայաստանը՝ հետախուզական անօդաչուներ։ Այսօրվա չզինվող, անպաշտպան Հայաստանը, վախենամ՝ վաղվա Արևմտյան Ադրբեջանն է։ Իսկ դա սողացող օկուպացիա է։
300 հազար ադրբեջանցիների՝ Հայաստան գալու հարցը ամենավտանգավորներից է։ Որտե՞ղ նրանք պետք է ապրեն․ մեր տներում, կունենան իրեն պատրաստի տները, վաղը կունենան ընտրելու և ընտրվելու իրավունք, այսինքն՝ իրենց գյուղապետ-քաղաքապետերը, պատգամավորները, դպրոցը, ուսուցիչը, ոստիկանը։ Փաշինյանի «իրական Հայաստան» ծրագիրը, վախենամ, Հայաստանը դարձնի Արևմտյան Ադրբեջան:
Մենք ուրախանում ենք ինչ-որ այցերով, ելույթներով, բայց իրականությունը և այն, ինչ մեզ սպառնում է, սարսափելի է»։