«Ծնողն ահազանգում է Երևանի թիվ 197 դպրոցում հնարավոր դրամահավաքների մասին»․ Կարինե Թորոսյան

«Ձեռքդ տուր» համայնքային զարգացման ՀԿ նախագահ Կարինե Թորոսյանի ֆեյսբուքյան գրառումը․ «Սոցիալական ցանցերում տարածվել է մի ծնողի ծավալուն և մտահոգիչ ահազանգ, որը վերաբերում է հնարավոր դրամահավաքներին և այլ խախտումներին՝ Երևանի թիվ 197 դպրոցում։
Ծնողը պնդում է, որ՝
․ 9-րդ դասարաններում պարտադրված գումարներ են հավաքվում
․ Գումարները փոխանցվում են դպրոցի ղեկավարության հետ կապված անձանց
․ Ծնողների բողոքները, ըստ ահազանգի, անտեսվում են
․ Երեխաների նկատմամբ, ըստ ծնողի, կիրառվում է տարբերակված վերաբերմունք
․ Քաղաքապետարանի թեժ գծին ուղղված զանգերը, ըստ ծնողի, մնացել են անարձագանք
․ Առկա են նաև հնարավոր հոգեբանական ճնշումների և սպառնալիքների վերաբերյալ պնդումներ
Հաշվի առնելով բարձրացված հարցերի լրջությունը՝ դիմում եմ՝
ՀՀ կրթության, գիտության, մշակույթի և սպորտի նախարարություն
Երևանի քաղաքապետարան
ոլորտը վերահսկող բոլոր պատասխանատու կառույցներին
խնդրելով՝
- Իրականացնել հրատապ և բազմակողմանի ստուգում
- Պարզել դրամահավաքների և հնարավոր պարտադրանքի առկայությունը
- Ստուգել գնահատման գործընթացի արդարությունը
- Ուսումնասիրել ծնողների բողոքների ընթացքը և արձագանքման մեխանիզմները
- Անհրաժեշտության դեպքում ապահովել երեխաների իրավունքների պաշտպանությունը։
Առանձնահատուկ խնդրում եմ նաև կրթության ոլորտի պատասխանատուներին, այդ թվում՝ Ժաննա Անդրեասյանին, ուշադրություն դարձնել բարձրացված խնդրին։
Խոսքը դեռևս ծնողի հայտարարության մասին է, և կարևոր է, որ այն ստանա օբյեկտիվ և թափանցիկ քննություն»։