«Արդյոք անհարմար չեք զգում, որ կաթողիկոսի նկատմամբ քրեական վարույթ է նախաձեռնվում». լրագրողը՝ ՔՊ-ականներին

Ինչպես օրեր առաջ հայտնել էր փաստաբան Արա Զոհրաբյանը, «ՀՀ դատախազությունը քրեական հետապնդում է հարուցել Ամենայն Հայոց Կաթողիկոսի նկատմամբ՝ Արման Սարոյանի հետ կապված դատական ակտի կատարմանը խոչընդոտելու մեղադրանքով:
Արգելվել է Վեհափառ Հայրապետի ելքը Հայաստանից, ինչով փորձ է արվում ձախողել Ավստրիայում կայանալիք եպիսկոպոսաց ժողովը»:

Այսօր՝ ԱԺ ճեպազրույցի ժամանակ, դիմելով ՔՊ-ականներին, լրագրողը հարցեց. «Ի՞նչ վտանգ է ներկայացնում Եպիսկոպոսաց ժողովը, որ փորձ է արվում խոչընդոտելու: Արդյոք անհարմար չեք զգում, որ ձեր իշխանության ժամանակ կաթողիկոսի նկատմամբ քրեական վարույթ է նախաձեռնվում»: Պատգամավոր Արթուր Հովհաննիսյանը պատասխանեց. «Ինչ վերաբերում է իրավական գործընթացներին, դրանց մեկնաբանության վերաբերյալ պետք է դիմել իրավապահ մարմիններին: Մեր իշխանության օրոք ՀՀ բոլոր քաղաքացիները հավասար են օրենքի առաջ ու եթե կա իրավական պրոցես հարուցելու անհրաժեշտություն, պետք է հարուցվի՝ անկախ քաղաքացու կարգավիճակից»: