Գերմանիան ժամանակավորապես դուրս է հանել իր զորակազմի մի մասն Իրաքից

Գերմանիան ժամանակավորապես դուրս է հանել իր զորակազմի մի մասն Իրաքից՝ Մերձավոր Արևելքում իրավիճակի սրման պատճառով, հաղորդում է AFP-ն՝ հղում անելով Գերմանիայի պաշտպանության նախարարությանը։
Նախարարության տվյալներով՝ որոշ գերմանացի զինվորներ տարհանվել են Իրաքի հյուսիսում գտնվող քրդական ինքնավար շրջանի վարչական կենտրոն Էրբիլում գտնվող բազայից։

Պաշտպանության նախարարության խոսնակը պարզաբանել է, որ տասնյակ զինվորներ լքել են օբյեկտը՝ թողնելով միայն դրա գործունեությունը պահպանելու համար անհրաժեշտ անձնակազմը։ Էսկալացիայի կոնկրետ պատճառները պաշտոնապես չեն բացահայտվել։

Էրբիլում գտնվող գերմանական զորակազմը մասնակցում է իրաքյան ուժերին մարզելու միջազգային առաքելությանը։ Բեռլինը ընդգծել է, որ վերադասավորությունը ժամանակավոր է և իրականացվել է բազմազգ գործընկերների հետ սերտ համակարգմամբ։

Ավելի վաղ ԱՄՆ-ի նախագահ Դոնալդ Թրամփը հրամայել էր զգալիորեն մեծացնել ամերիկյան զորքերի ներկայությունը տարածաշրջանում՝ ուղարկելով լրացուցիչ նավեր, ինքնաթիռներ և զենք, ինչպես նաև սպառնացել էր Իրանին հնարավոր միջոցներով։