«Մայրուղու ասֆալտը մնացել է ցեխի տակ, ստեղծվում է վթարային իրավիճակ»․ Շիրակ Բունիաթյան

Ջերմուկի բնակիչ, բնապահպան Շիրակ Բունիաթյանն ֆեյսբուքյան էջում գրել է․ «Կարծում եմ՝ պատկան մարմինների և համայնքային իշխանության լուռ անտարբերության, կամ էլ «չնկատելու» բացառիկ կարողության հետևանքն է Գնդեվազ գյուղի տարածքում՝ դեպի Ամուլսար տանող հողային ճանապարհների մուտքի ու ելքի հետևանքով առաջացած իրավիճակը։
Այդ ճանապարհներով այժմ երթևեկում են հիմնականում Ամուլսարի տարածքում շինարարական աշխատանքներ իրականացնողները։ Ասեմ ավելին՝ մեքենաների 99%-ի դիմապակուն փակցված է կանաչ ստիկեր՝ «Lydian» գրությամբ։
Մայրուղին այդ հատվածներում ամբողջությամբ պատված է ցեխով։ Մեքենաները հողային ճանապարհից ցեխոտ անիվներով անընդհատ մուտք ու ելք են անում, ինչի հետևանքով մայրուղու ասֆալտը մնացել է ցեխի տակ։
Քանի որ Ամուլսարի համար պայքարում արդեն ունեմ դատարաններով անցնելու փորձ և իրավաբանական կրթություն, ասածս փաստելու համար օրեր շարունակ հավաքել եմ տարբեր լուսանկարներ, տեսանյութեր և «փակ» ուղիղ եթերներ։ Բոլոր կասկածողներին կարող եմ ցույց տալ։
Գիտեք, գրառումս նպատակ չունի համացանցում ֆուրոր առաջացնելու, շատ լայքեր հավաքելու կամ էլ ինձ ավելի հայտնի դարձնելու։ Դրա համար էլ գրառմանս կից չեմ տեղադրում դեպի առողջարանային Ջերմուկ քաղաք տանող միակ ճանապարհի այդ հատվածի, մեղմ ասած, ոչ էսթետիկ տեսքից նյութերը։
Ունեմ նաև նյութեր, թե ինչպես շատ ցեխոտ ամենագնացներ՝ դիմապակուն ունենալով նույն ստիկերները, կայանված են Ջերմուկի հյուրանոցների, առողջարանների, շենքերի բակերում կամ շրջում են առողջարանային քաղաքի տարածքում՝ գրավելով զբոսաշրջիկների ուշադրությունը։
Այս գրառումը ակտիվիստ լինելու մասին չէ։ Սա խնդիր է, որը պետք է հետաքրքրի բոլորիս և ստանա լուծում։
Ես միշտ սարերում եմ և գիտեմ, որ այս եղանակին՝ ձնհալի պայմաններում, հատկապես ամենագնացները շատ են ցեխոտվում։ Սակայն բացի էսթետիկ տեսքից կա նաև անվտանգության խնդիր։
Մասնավորապես՝ շատ վատ վիճակում է Գնդեվազի թռչնաբուծարանին մոտ հատվածից դուրս եկող հողային ճանապարհը, որն, ի դեպ, վերանորոգվել է հենց Ամուլսարի տարածքում շինարարություն իրականացնողների կողմից և այժմ ակտիվ շահագործվում է նրանց կողմից։ Այդտեղ ճանապարհը ոլորապտույտ է, և մեքենաները միանգամից ցեխի վրա հայտնվելով՝ կորցնում են կառավարումը․ ստեղծվում է վթարային իրավիճակ։
Մի քիչ երկար ստացվեց, բայց կարճ կասեմ լուծումը։
Պետք է վերահսկողություն և օրենքով պարտադրանք, որպեսզի մեքենաները լվացված դուրս գան մայրուղի և մաքուր երթևեկեն զբոսաշրջային Ջերմուկում։
Գիտեմ, որ նշածս մարմիններն ակտիվ հետևում են էջիս։ Հուսով եմ՝ կլինեն օպերատիվ»։