«Ազգովի պետք է պահանջենք հայ գերիների վերադարձ»․ Գևորգ Սուջյան

«Ցեղասպանության նման մի բան է այն, որ բռնի տեղահանվեցին մեր արցախցի հայրենակիցները․ դա անընդունելի է»,- այս մասին այսօր Ծիծեռնակաբերդի հուշահամալիրում լրագրողների հետ զրույցում ասել է Բաքվի գերությունից վերադարձած Գևորգ Սուջյանը։

Խոսելով Բաքվում պահվող հայ գերիների մասին՝ նա հայտնել է, որ լուրջ մտահոգություններ ունի՝ կապված նրանց առողջական վիճակի հետ։ Նրա խոսքով՝ Ադրբեջանը թույլ չի տալիս որևէ երրորդ կողմի վերահսկել գերիների առողջական վիճակը։ «Այնտեղ բժշկական միջամտությունը զրո մակարդակի վրա է։ Երեկոյան ժամը վեցից հետո առհասարակ բժշկություն չկա, նույնիսկ մի բուժքույր չկա։ Եթե մեկի հետ մի բան պատահի, ոչ մի բժշկական միջամտություն չի լինելու, կարող է մահանալ»,- ասաց նա։
Սուջյանը նաև հայտնել է, որ դիմել է Մարդու իրավունքների եվրոպական դատարան՝ բողոքարկելով հայ քաղաքացիներին Բաքվում անօրինական բռնադատելու դեմ։

«Ինձ անօրինական բռնել են ու անօրինաբար դատել են։ Հենց դա է, որ պետք է ապացուցվի, որ անօրինական գործողություններով են առաջնորդվում Ադրբեջանի ղեկավարները»,- նշեց Սուջյանը՝ հավելելով, որ ազգովի պետք է պահանջել հայ գերիների վերադարձ։