Տեղացի ֆերմերը Դուբային է նվիրել 200 հազվագյուտ ծառ

Դուբայի փողոցները շուտով կներկվեն վառ կարմիր երանգներով՝ շնորհիվ տեղացի ֆերմեր Ահմեդ Ալ Հաֆեյտիի մեծահոգի նվիրատվության։ Արձագանքելով քաղաքի կանաչապատման պետական ծրագրին՝ նա քաղաքապետարանին է հանձնել 200 «կրակե ծառ», որոնք հայտնի են իրենց արտասովոր գեղեցկությամբ և շոգ կլիմային դիմակայելու ունակությամբ։ Հատկանշական է, որ ֆերմերը նվիրել է ոչ թե տնկիներ, այլ արդեն հասուն, 5-6 մետր բարձրություն ունեցող ծառեր, ինչը թույլ կտա անմիջապես զգալ դրանց դրական ազդեցությունը քաղաքային միջավայրի վրա։ Ալ Հաֆեյտիի խոսքով՝ սա իր համեստ ներդրումն է հայրենիքի շենացման գործում, քանի որ այս բույսերը ոչ միայն գեղեցկացնում են փողոցները, այլև իսկական փրկություն են դառնում ամառային տապին։
Գիտականորեն Delonix regia անվամբ հայտնի այս ծառերը համարվում են աշխարհի ամենագեղեցիկ բույսերից մեկը։ Դրանք ունեն լայն ու տարածուն սաղարթ, որը կարող է հասնել մինչև 15 մետր տրամագծի՝ ստեղծելով հսկայական բնական հովանոց։ Գիտնականները հաշվարկել են, որ «կրակե ծառի» ստվերում օդի ջերմաստիճանը մոտ 5 աստիճանով ավելի ցածր է լինում, քան բաց տարածություններում, ինչը չափազանց կարևոր է Դուբայի նման շոգ քաղաքների համար։ Ծառն աչքի է ընկնում արագ աճով և երկարակեցությամբ. այն կարող է ապրել մինչև 60 տարի՝ հասնելով 12 մետր բարձրության և ծաղկելով մայիսից հուլիս ամիսներին:
Ալ Հաֆեյտին պարբերաբար աջակցում է նաև դպրոցներին ու պետական հաստատություններին՝ տրամադրելով մասնագիտական օգնություն ծառերի տնկման և խնամքի հարցում։