«Վստա՞հ ենք, որ ՀՀ գործող իշխանությունները անվերադարձ շրջադարձ են արել»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Հայկական իրականության մեջ բավականին ինտենսիվ կերպով գրվում է այն թանկ գնի մասին, որ Հայաստանը պետք է, պատրաստ է, կարող է վճարել Ռուսաստանի հետ հարաբերությունների լարման և ԵՄ-ի ու ԱՄՆ-ի հետ մերձեցման դիմաց:
Այո, ամեն ինչ իր գինն ունի, և, մեծ հաշվով, մենք գին վճարել ենք նաև Ռուսաստանի հետ հարաբերությունների համար՝ բոլոր ձվերը դնելով նույն զամբյուղի մեջ:
Այս դառը սուրճի հետ ես չեմ ուզում քննարկել, թե այդ գինը ինչքան թանկ կլինի: Դա էլ շատ կարևոր է, եթե կուզեք, ամենից կարևորն է: Բայց ես ուզում եմ այլ բանի մասին գրել:
Մենք վստահ ե՞նք, որ ՀՀ գործող իշխանությունները անվերադարձ շրջադարձ են արել, թե՞ այս ամենը Հայաստանի հաշվին իշխանություն պահելու ձև է:
Այսինքն, մենք վստահ ե՞նք, որ Սիրիա զորք չենք ուզարկի, ինչպես 2019-ին արեցինք:
Մենք վստահ ենք, որ Հայաստանը հեռանալու է ԵԱՏՄ-ից, ՀԱՊԿ-ից ու ԱՊՀ-ից:
Մենք վստահ ե՞նք, որ 2028-ին չենք նշելու Թուրքմենչայի պայմանագրի 200-ամյակը:
Այս հարցերի պատասխանը ես չունեմ»: