«Հուլիսի կեսերին կառավարությունը որոշում կընդունի ՀԷՑ–ը հանրության գերակա շահ ճանաչելու մասին»․ Ռոմանոս Պետրոսյան

Այսօր լրագրողների հետ զրույցում ՀԷՑ-ի ժամանակավոր կառավարիչ Ռոմանոս Պետրոսյանը, պատասխանելով հարցին, թե պետությո՞ւնն է ներդրում անելու, թե՞ մասնավորը, ՀԷՑ-ի խնդիրները լուծելու համար, պատասխանեց․ «Դա արդեն պետականացման վերջնական ավարտից հետո պարզ կլինի․ վերամասնավորեցման դեպքում՝ մասնավորը, պետականացված մնալու դեպքում՝ պետությունը, գուցե կոնցենսիոն կառավարման տրվի»։

Պետրոսյանը հավելեց, որ արդեն հուլիսի կեսին ՀԷՑ-ը կպետականացվի, որին կհաջորդեն շուկայական արժեքի գնահատումն ու փոխհատուցումը. «Հուլիսի կեսերին կառավարությունը որոշում կընդունի ՀԷՑ–ը հանրության գերակա շահ ճանաչելու մասին»:

Հիշեցնենք, որ ավելի վաղ նա գրել էր, որ հաշվի առնելով, որ սահմանված ժամկետներում բաժնետոմսերի օտարում տեղի չի ունեցել, ՀՀ կառավարության կողմից նախաձեռնվելու է «Հայաստանի էլեկտրական ցանցեր» ՓԲԸ բաժնետոմսերի՝ հանրության գերակա շահ ճանաչելու և օտարելու (պետականացնելու) գործընթաց: