«Երկրի ղեկավարը պետք է լինի բանակում ծառայած, պաշտպանության նախարարը` պրոֆեսիոնալ զինվորական»․ Արա Պողոսյան

Քաղաքագետ Արա Պողոսյանի ֆեյսբուքյան գրառումը․ «Ու նորից զոհ բանակում... Ու լսում ենք ավանդական ծեծված «վա՜շ-վի՜շ»-ները, ու հետո՝ նորից լռություն, անտարբերություն, ատելության հերթական չափաբաժնի տարածում։
Ու լսում ես, թե ելքեր են փնտրում, առաջարկում...
Չէ‘, ժողովուրդ ջան, ո'չ հոգեբանն է էս խնդիրը լուծելու, ո'չ բանակում բանտային ռեժիմի հաստատումը, ո'չ էլ սպաներին քավության նոխազ դարձնելը։ Բանակը դուք չեք ճանաչում, բանակի ներքև-վերևը դուք չգիտեք, «отбой-пойдём»-ից հետո տեղի ունեցողի մասին պատկերացում չունեք, ու դուք ուզում եք բանակում ինչ որ բան փոխել։ Բանակը հասարակության հայելին է՝ ամենալայն իմաստով, ու ինչ ատելությամբ դուք իրար եք ատում, նույն ատելությամբ բանակում են իրար ատում։ Ամեն ինչ կարող է դառնալ վեճ, ծեծ ու կռիվ։ Ձեր զավակներին սովորեցնելով դառնալ «ներքին նիստ ու կացը տեղ հասցնող»՝ դուք միայն ձեր զավակի համար ծանր ու դժվար ծառայություն եք ապահովում։ Ո'չ մեկին դուր չի գա, որ իր կողքին ապրի մեկը, ով ամեն ինչ կարող է հաղորդել «ուր որ հարկ է»: Ու էսպիսի հազարավոր օրինակներ, որոնք ձևավորում են ծառայողների միջև փոխհարաբերությունները։
Բանակը զեկույցից զեկույց ճանաչողը չի կարող բանակում կարգ ու կանոն հաստատել։ Ահա թե ինչու պետք է երկրի ղեկավարը առնվազն լինի բանակում ծառայած։
Պաշտպանության նախարարը՝ պրոֆեսիոնալ զինվորական, առնվազն այնքան ժամանակ, մինչև հայկական բանակը կդառնա ինստիտուցիոնալիզացված և զինվորական մշակույթ-ավանդույթ ունեցող համակարգ։
Մնացածը ինչքան կուզեք վաշ-վիշ քաշեք, բան չի փոխվելու»։