«Ատեստացիայի նպատակը բացարձակ քաղաքական է»․ Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Նիկոլ Փաշինյանը հայտարարում է, թե՝ չատեստավորված ուսուցիչը չպետք է աշխատի։
Մի կողմ թողնենք այն, որ ներկայիս կառավարող ուժն իր՝ թե բարձրաստիճան պաշտոնյաների, թե միջին ֆունկցիոներների կենսագրական հետագծի պայմաններում՝ գրեթե ոչմիտեղից միանգամից դեպի իշխանություն, չունի որևէ մասնագիտական տիրույթում ատեստացիայի մասին խոսելու բարոյական իրավունք։
Հարցն այն է, որ ատեստացիայի նպատակը բացարձակապես մասնագիտական չէ։ Ատեստացիայի նպատակը քաղաքական է, բացարձակ քաղաքական։ Ատեստացիան յուրօրինակ «թուր» է, որի տակով պարզապես կառավարող ուժն անցկացնում է առանձին ոլորտների ներկայացուցիչների։
Բնական է, որ ուսուցիչներն այստեղ պետք է լինեին առաջիններից մեկը, քանի որ դա կարևորագույն ոլորտ է՝ հանրակրթություն, որտեղ ձևավորում են մարդուն, նրա մտածողությունը, աշխարհայացքը և այլն։ Ըստ այդմ, այդ ձևավորողներին պետք է անցկացնել «թրի» տակով, որի անունը դրել են ատեստացիա»։