«Մեր արևմտյան և արևելյան հարևանների ընկալումով իրական Հայաստանի գաղափարախոսությունը ՀՀ-ի ապազգայնացումն է»․ Թաթուլ Հակոբյան

Լրագրող Թաթուլ Հակոբյանը ֆեյսբուքյան էջում գրել է. «Իրական Հայաստանի գաղափարախոսությունը, մեր արևմտյան և արևելյան հարևանների ընկալումով, Հայաստանի ապազգայնացման քաղաքականությունն է:
Դրան, մեր հարևանները տալիս են այլ անուն, այն է՝ Հայաստանի դենացիֆիկացիա: Բառը, ինքնին, անընդունելի է, ստորացուցիչ և կեղծ, քանի որ մեր երկրիում նացիզմ չի եղել: Այսօրվա Ադրբեջանը ավելի հակահայ է, քան Հայաստանը՝ հակաթուրք:
Ապազգայնացումը նշանակում է պայքար հետևյալ ուղղություններով.
ա/ պատմության վերանայում և վերաշարադրում, որտեղ թուրքը այն թուրքը չէ, որ կա հայի ուղեղում,
բ/ Հողահավաքի ու պահանջատիրության մերժում և դատապարտում,
գ/ Հայոց եկեղեցու դեմ պայքար,
դ/ հակաթուրքականությունը սնուցող հիմնական աղբյուրներից մեկի խեղդում՝ Սփյուռք,
ե/ ավանդական սիմվոլիկայի մերժում:
Կարելի է կետերը շարունակել և դրանցից ամեն մեկը բացել, բայց մի բաժակ սուրճը, ինչքան էլ դառը լինի, բավարար չէ նման ընդգրկուն թեմաների համար»: