«ՏԻՄ ընտրություններում առաջադրվելը բանտի ուղեգիր է․ ընդդիմադիրները չեն համարձակվում մասնակցել»․ Կարապետ Պողոսյան

«Ընտրությունները Հայաստանում չեն կայանում, սովորաբար ընտրություններում հաղթանակ տարած այն մարդիկ, որոնք իշխանության ներկայացուցիչներ չեն, իրենց աշխատանքը սկսում և ավարտում ե ՔԿՀ-ներում․․․ Դա տեղի ունեցավ Վանաձորում և Գյումրիում․ բոլորը հիշում են, թե իշխանությունն ինչ սադրանքներ հրահրեց և մարդիկ հայտնվեցին բանտերում։ ՔՊ-ն իշխանազավթման հերթական պրոցես է տանում, նշանակումներ է կատարելու և ոչ թե ընտրություններ են լինելու»,- «24 Նյուզ»-ի հետ զրույցում նշեց գյումրեցի ընդդիմադիր գործիչ Կարապետ Պողոսյանը՝ անդրադառնալով հարցին, թե արդյոք առաջիկա ՏԻՄ ընտրություններում ընդդիմադիրները կարող են հաղթանակ տանել։

«Ախուրյան համայնքը Գյումրիին մոտ է, այնտեղ կան ընդդիմադիր զարգացած կառույցներ, բայց այնտեղ մասնակցելու է միայն ՔՊ-ն, նույնիսկ գրպանային կուսակցությունները չեն մասնակցում․․․ Չեն մասնակցում, որովհետև յուրաքանչյուրը հասկանում է, որ ընտրությանը մասնակցելը բանտի ուղեգիր է»,- մեկնաբանեց Պողոսյանը՝ նկատելով, որ նույնիսկ ԱԺ-ում ներկայացված ընդդիմադիր ուժերը չեն համարձակվում մասնակցել ընտրություններին։