Շաքիում վիրավորում ստացած Անի Ավետիսյանը և նրա երեխաներից երկուսը տուժող են ճանաչվել

Շաքիում ադրբեջանցի զինծառայողից երեխաներին պաշտպանելիս վիրավորում ստացած Անի Ավետիսյանը և նրա երեխաներից երկուսը տուժող են ճանաչվել, այս մասին «Փաստինֆո»-ին հայտնել են ՀՀ քննչական կոմիտեից։

Աղբյուրի փոխանցմամբ՝ դիտարկվող քրեական վարույթի շրջանակներում կա մեկ մեղադրյալ. ադրբեջանցի զինծառայող Նասիմի Ռահիմ Օղլի Մուսաևին մեղադրանք է ներկայացվել ՀՀ սուվերեն տարածք ապօրինի ներթափանցելու, մաքսանենգության, առողջության ծանր վնաս պատճառելու, ապօրինի հրազեն ձեռք բերելու, մարդու կամքին հակառակ նրա բնակարան ապօրինի ներխուժելու համար։ Նրա նկատմամբ դատարանը որպես խափանման միջոց է ընտրել կալանավորումը, սակայն պատկան մարմիններն առայժմ չեն հստակեցնում՝ արդյոք նա արդեն ՔԿՀ տեղափոխվել է, թե գտնվում է բժշկական կենտրոնում։ ՔԿ-ից ուղիղ հարցադրմանը կարճ պատասխանել են՝ չեն մեկնաբանում։