«Էլեկտրոնային սիգարետներն անվնաս չեն»․ ԱՆ

ՀՀ առողջապահության նախարարությունը հայտնում է․ «Ծխախոտը միայն սիգարետը չէ։
Այսօր մարդիկ օգտագործում են ոչ միայն սովորական սիգարետներ, այլև նարգիլե, տաքացվող ծխախոտային արտադրատեսակներ, էլեկտրոնային սիգարետներ, նիկոտինային բարձիկներ և նիկոտին պարունակող այլ արտադրանքներ։

Արտադրանքի ձևը փոխվում է, սակայն նիկոտինը շարունակում է կախվածություն առաջացնել։
Մի քանի կարևոր փաստ
* Ծխախոտի ծուխը վնասում է ոչ միայն ծխողին։
* Պասիվ ծխի ազդեցությունը բերում է մի շարք հիվանդությունների ռիսկի բարձրացման:
* Չկա երկրորդային ծխի ազդեցության անվտանգ մակարդակ։
* Նարգիլեն անվտանգ այլընտրանք չէ։
Նարգիլեի օգտագործումը նույնպես առաջացնում է առողջական խնդիրներ՝ պայմանավորված ծխի և վնասակար նյութերի ազդեցությամբ։
Էլեկտրոնային սիգարետներն անվնաս չեն։
Դրանց աերոզոլները կարող են պարունակել նիկոտին և այլ թունավոր և քաղցկեղածին նյութեր, իսկ նիկոտինը հատկապես վտանգավոր է դեռահասների նյարդային համակարգի համար։
«Առանց ծխի» կամ «ավելի քիչ վնասակար» չի նշանակում «անվնաս»։
Նոր նիկոտինային արտադրատեսակների նկատմամբ անհրաժեշտ է զգուշություն․ դրանց ձևավորումն ու մարքեթինգը հաճախ ուղղված են արտադրանքը հատկապես դեռահասների համար գրավիչ դարձնելուն և նոր օգտագործողներ ներգրավելուն։
Ծխելը դադարեցնելու համար աջակցություն կա։
Հնարավոր է ծխելը դադարեցնել. մասնագիտական աջակցությունը, վարքագծային խորհրդատվությունն ու ապացուցված դեղորայքային միջոցները օգնում են հաջողությամբ դադարեցնել ծխելը։ Իսկ լավն այն է, որ առողջությունը սկսում է վերականգնվել հենց թողնելուց հետո։
Ծխելը դադարեցնելուց հետո օրգանիզմում դրական փոփոխությունները սկսվում են արդեն առաջին ժամերից, իսկ ժամանակի ընթացքում նվազում են սրտանոթային և շնչառական համակարգերի, քաղցկեղների և մի շարք այլ հիվանդությունների ռիսկերը։ Ծխելը թողնելու համար երբեք ուշ չէ։
Տեղեկացված լինելը նույնպես պաշտպանություն է։
Հարցրե՛ք, հետաքրքրվե՛ք, ստուգե՛ք տեղեկությունը և մի՛ հավատացեք այն ամենին, ինչ ներկայացվում է որպես «անվտանգ», «թեթև» կամ «առանց վնասի»։
- Պաշտպանե՛ք Ձեր առողջությունը։
- Պաշտպանե՛ք Ձեր ընտանիքը։
- Աջակցե՛ք ծխախոտից ազատ միջավայրին»։