«Լրատվամիջոցներին գաղտնի տեղեկություններ փոխանցող պետական պաշտոնյաներին պետք է գնդակահարել». Թրամփ

ԱՄՆ նախագահ Դոնալդ Թրամփը հայտարարել է, որ ցանկացած պետական ծառայող, որը լրատվամիջոցներին գաղտնի տեղեկություններ է հրապարակում, պետք է խիստ պատժի ենթարկվի։

«Իմ կարծիքով՝ գաղտնի տեղեկություններ բացահայտողներին պետք է գնդակահարել։ Օրինակ՝ երբ նրանք (տեղեկատվության արտահոսքի համար պատասխանատուները – խմբ․) հայտնում են, թե որ ժամին եք պատրաստվում հարձակվել որևէ երկրի վրա»,- Արիզոնա նահանգում հանրահավաքից հետո լրագրողներին ասել է ԱՄՆ նախագահը։ Նրա խոսքերը մեջբերում է NBC News հեռուստաալիքը։

Թրամփը հավելել է, որ Վաշինգթոնը ստիպված է եղել չեղարկել Իրանի վրա նախատեսված հարձակումը, քանի որ «ինչ-որ սրիկա» CNN-ին և The New York Times-ին տեղեկատվություն է փոխանցել որոշ ամերիկացի պաշտոնյաների մեկ նահանգից մյուսը մեկնելու և ժամանելու ժամերի մասին։

«Տեղեկատվություն փոխանցողների հետ պետք է շատ, շատ խիստ վարվել։ Իմ կարծիքով, նրանք հասարակության տականքներ են»,-եզրափակել է Սպիտակ տան ղեկավարը։