«Ռուսաստանը նման ծավալով զենք չի մատակարարի Ադրբեջանին, ինչ մինչև 2016թ. ապրիլն էր». Կոսաչով

Ադրբեջանին ռուսական զենքի մատակարարումներն իրականացվել են համաձայնագրերի շրջանակներում, որոնք ձեռք էին բերվել մինչ 2016թ. ապրիլյան պատերազմը: Այս մասին այսօր Երևանում մամուլի ասուլիսի ժամանակ ասել է ՌԴ Դաշնային խորհրդի՝ միջազգային հարցերով հանձնաժողովի ղեկավար Կոնստանտին Կոսաչովը:

Նա պատասխանել է լրագրողներին այն հարցին, թե ինչու է Ռուսաստանն ԱՄՆ-ին մեղադրում Ուկրաինային զենք վաճառելու համար՝ նշելով, որ անթույլատրելի է հակամարտող կողմերին սպառազինություն մատակարարելն, այն դեպքում, երբ նույն ինքը՝ Ռուսաստանը, 2011-ին 5 միլիարդ դոլարի չափով զենք վաճառեց Ադրբեջանին:

Նրա խոսքով՝ Ռուսաստանն իրականացնում է այն պայմանագրերը, որոնք կնքվել էին մինչ 2016թ. ապրիլը:

«Անկասկած, մենք արձագանքում ենք այն իրավիճակին, որը տեղի ունեցավ 2016թ. ապրիլին: Դրանում որևէ կասկած չկա»,- ընդգծել է նա: