«Կարծում եմ՝ ՀՀԿ-ն կհաստատի կառավարության ծրագիրը». Էդմոն Մարուքյան

«Ելնելով իրողություններից, այո, «Ելք»-ն արդեն լինելու է իշխանական խմբակցություն և պետք է աջակցենք գործող կառավարությանը: Մենք լինելու ենք Փաշինյանի կառավարության թիկունքն Աժ-ում»,- Աժ ճեպազրույցների ժամին հայտարարել է Էդմոն Մարուքյանը: Անդրադառնալով Փաշինյանի ընտրությանն ու նոր կառավարության ծրագրին՝ համոզմունք է հայտնել, որ ՀՀԿ-ն կհաստատի Նիկոլ Փաշինյանի ծրագիրը. «Եթե ՀՀԿ-ն չպիտի հաստատի, ապա անիմաստ է ընտրել նրան որպես վարչապետ, ավելին, եթե չի հաստատում, նորից երկփուլանի ընտրություն է սկսվում, իմաստը ո՞րն է, երբ մենք հիմա էդ փուլում ենք.. Կարծում եմ՝ ՀՀԿ-ն կհաստատի կառավարության ծրագիրը»: Նրա խոսքով՝ այսօրվա համակարգն այնպիսին է, որ Փաշինյանի կառավարությունն Աժ չգալով՝ երկրում կարող է միջավայր փոխել. «Նա կարող է ձևավորել գործադիր իշխանություն ու տնտեսական ուղերձներ հղել, հարկային, մաքսային վարչարարություն անել, որևէ խնդիր չկա»:

Դիտարկմանը՝ Փաշինյանն ասում էր կբերենք ծրագիր, ՀՀԿ-ն կմերժի, կլինեն Աժ արտահերթ ընտրություններ, Մարուքյանը նշել է. «Նա ասում էր, որ ԸՕ-ն պետք է փոխվի, նոր լինեն Աժ ընտրություններ: Իսկ դա չի կարող փոփոխության ենթարկվել, մինչև կառավարության ծրագիրը բերելը: ԸՕ-ի փոփոխությունը 20 օրվա բան չէ: Աժ-ն ցրելու տարբերակները 20 օրվա մասին չեն. դա կարող է լինել, օրինակ, 3-4 ամսից»: