«Վրաստանի վարչապետն ամբիցիոզ առաջարկ է արել. հայկական կողմը հավանություն է տվել». Նիկոլ Փաշինյան (տեսանյութ)

Հայ-վրացական հարաբերությունները փայլուն են, և այդ հարաբերություններում տնտեսական բաղադրիչը բովանդակային մակարդակին համապատասխանեցնելու խնդիր ունենք: Այս մասին այսօր Վրաստանի վարչապետ Մամուկա Բախտաձեի հետ համատեղ մամուլի ասուլիսի ժամանակ ասել է ՀՀ վարչապետ Նիկոլ Փաշինյանը:

Վարչապետը նշել է, որ Բախտաձեի հետ քննարկել են տրանսպորտային, առևտրատնտեսական, քաղաքական, մշակութային, հումանիտար փոխգործակցությանն առնչվող հարցեր:

Վարչապետի խոսքով՝ Վրաստանի գործընկերոջ կողմից հավակնոտ ծրագիր է առաջարկվել, որը հայկական կողմից հավանության է արժանացել:

«Հստակ խնդիր է ձևակերպվել առաջիկա տարիներին փոխադարձ առևտրաշրջանառությունը հասցնել 1 միլիարդ դոլարի մակարդակի: Սա հստակ խնդիր է, որի նկատմամբ կարող ենք բոլորս դիրքավորվել, ունենալ հստակ ճանապարհային քարտեզ և պայմանավորված քայլերով գնալ դեպի խնդրի լուծումը»,- ասել է Նիկոլ Փաշինյանը՝ հավելելով, որ ամեն այցի հետ հայ-վրացական հարաբերություններն ավելի են զարգանում, և որ այդ տեմպը պետք է անպայման շարունակել և վստահ քայլերով առաջ գնալ: