Ապրիլյան նահատակ Վիկտոր Յուզիխովիչի մայրը որդի է լույս աշխարհ բերել. նորածնին Վիտյա կանվանեն

2016 թվականի ապրիլյան պատերազմում նահատակված Վիկտոր Յուզիխովիչի ընտանիքում կրկին մանկան ճիչ է լսվել, գրում է Armtimes.com-ը: Երեկ ուշ երեկոյան Վիկտորի մայրը որդի է լույս աշխարհ բերել: Նորածինը ծնվել է Գյումրու Ավստրիական մանկական հիվանդանոցի ծննդատանը՝ 3կգ 250գ քաշով և 53 սմ հասակով: «Մայրն էլ, փոքրիկն էլ առողջ են, լավ են զգում»,- ՀԺ-ի հետ զրույցում ասել է հիվանդանոցի բժիշկ Արմեն Մկրտչյանը:

Երեխայի անունը Վիտյա են դնելու, քանի որ Վիկտորին տանն ու շրջապատում բոլորը հենց այդ անունով են դիմել:

Ըստ բժիշկ Արմեն Մկրտչյանի, երբ Աննա Յուզիխովիչը հղիության մասին իմացել է, աննկարագրելի սթրեսի մեջ է եղել: «Դա անսպասելի էր ևʹ Աննայի, ևʹ մեր համար, քանի որ ֆիզիոլոգիական առումով նա այլևս երեխա ունենալու հնարավորություն փաստացի չուներ: Աննան 42 տարեկան է: Բայց Աստծո համար անկարելի բան չկա»,- ասել է բժիշկը: